ՀՀԿ-ն երբեք չի ասել, թե իր մոտ ամեն ինչ փայլուն է ստացվում, ավելին՝ միշտ նշել է, որ իր կառավարման տարիների և լավը, և վատը իր գործունեության արդյունքն են. այսօր լրագրողների հետ հանդիպմանը ասաց ՀՀԿ-ական պատգամավոր Արտակ Դավթյանը:
Լրագրողներից մեկի հարցին՝ տեսականորեն պատկերացնո՞ւմ է, որ ՀՀԿ-ական որևէ գործչի հանդեպ փողերի լվացման համար քրգործ կհարուցվի, ինչպես արվեց ՀՀ նախկին արտգործնախարար Վարդան Օսկանյանի հետ, պատգամավորը նկատեց.
«Տեսականորեն ոչինչ չի կարելի բացառել: Անկախ նրանից՝ հանցանք գործողը հանրապետական է, թե ոչ, պետք է պատժվի: Բոլոր կուսակցությունները ծառայում են պետականության ամրապնդմանը, Սահմանադրության ամրագրված խնդիրների լուծմանը»:
Արտակ Դավթյանի համոզմամբ՝ հինգերորդ գումարման ԱԺ-ն տարբերվելու է նախորդներից, բայց թե որքան շահեկանորեն՝ ժամանակի հարց է:
«Պատգամավորներից յուրաքանչյուրին պետք է հարցնել՝ ինչպե՞ս են պատրաստվում աշխատել խորհրդարանում»:
Հարցին՝ նորմա՞լ է վերաբերվում նրան, որ կառավարության ծրագիրը ՀԱԿ-ի հետ այդպես էլ չքննարկվեց, խորհրդարանականը պատասխանեց. «Ոչ թե նորմալ եմ համարում, այլ կարծում եմ, որ այլընտրանք ուղղակի չկար: Եթե մարդիկ ցանկություն չունեն նման քննարկման մասնակցելու, ինչի՞ մասին է խոսքը»:
Ամփոփելով՝ Արտակ Դավթյանը նկատեց, որ համաձայն ԱԺ կանոնակարգ օրենքի՝ քաղաքական ուժը համարվում է ընդդիմադիր, եթե նիստերից մեկի ժամանակ ուղղակիորեն հայտարարում է այդ մասին, երկրորդ՝ կառավարությունում պորտֆելներ չի ունենում: «Այս պահի դրությամբ ԲՀԿ-ն բավարարել է միայն երկրորդ պայմանը, առաջինը՝ ոչ»,- նկատեց խորհրդարանականը:
