Rosbalt.ru-ի փոխանցմամբ՝ ՄԱԿ-ի գլխավոր քարտուղար Պան Գի Մունը Գլխավոր ասամբլեայի դիտարկմանն է ներկայացրել «Վրաստանի, Աբխազիայի ու Հարավային Օսիայի ներքին տեղահանվածների դրության մասին» զեկույցը:
ՄԱԿ-ի Լրատվական կենտրոնի հաղորդմամբ՝ այդ փաստաթղթում նշված է, որ 2008 թվականի հակամարտությունից հետո հարկադրաբար վերաբնակիչ դարձած ավելի քան 100.000 մարդ վերադարձել է տուն: Վրաստանի կառավարության տվյալներով՝ 2012 թվականի մարտի վերջի դրությամբ երկրում հաշվվում էր 265.295 ներքին տեղահանված: 2010 թվականին այդ ցուցանիշը կազմել է 256.528 մարդ:
Աճը հիմնականում պայմանավորված է ներքին տեղահանվածների շրջանում ծնելիության աճով, երրորդ երկրներից Վրաստանի վերաբնակների վերադարձով ու անչափահասների գրանցմամբ: Նշվում է, որ ներքին տղահանվածների թվում են նաև ավելի վաղ տեղի ունեցած հակամարտությունների հետևանքով ներքին փախստական դարձած 242.592 մարդ, 18.789 մարդ վերաբնակեցվել է 2008 թվականի օգոստոսյան հակամարտության ժամանակ, 3914 մարդ կրկնակի վերաբնակեցված է:
Ընդհանուր առմամբ, ՄԱԿ-ի գլխավոր քարտուղարի զեկույցն ընդգրկում է 2011 թվականի ապրիլի 1-ից մինչև 2012 թվականի մարտի 30-ն ընկած ժամանակահատվածը և հիմնված է ՄԱԿ-ի մի շարք հիմնարկներից ստացված տեղեկատվության վրա:
