Այսօր լրագրողների հետ հանդիպմանը «Շահումյան-Գետաշեն» հայրենակցական միության նախագահ Էդիկ Բալայանն անդրադարձավ շուրջ 19 տարի առաջ Շահումյանում տեղի ունեցած իրադարձություններին՝ նշելով, որ այդ օրը տեղի բնակչության համար ողբերգական էր:
«19 տարի առաջ` հունիսի 13-ին, ադրբեջանական բանակը լայնամասշտաբ հարձակում գործեց Շահումյանի վրա՝ այնտեղ կենտրոնացնելով իր ողջ ռազմական տեխնիկան: Չնայած հայկական կողմի դիմադրությանը՝ Շահումյանի անկումից չհաջողվեց խուսափել»,- ասաց նա:
Բանախոսի խոսքերով՝ Գետաշենի և Շահումյանի օկուպացման արդյունքում անօթևան մնացին 21 000 հայ փախստականներ, որոնք հուսով են, թե կարող են վերադառնալ հայրենի գյուղեր:
Էդիկ Բալայանը նշեց, որ իրենք պահանջում են ԵԱՀԿ Մինսկի խմբի բանակցային գործընթացի մեջ ներառել նաև Հյուսիսային Արցախի խնդիրը. «Բանակցային սեղանին ակտիվորեն քննարկվում է ԼՂՀ հարցը, սակայն Շահումյանի և Գետաշենի մասին ոչինչ չի խոսվում: Մենք պահանջում ենք, որ Մինսկի խումբը փաստահավաք խումբ գործուղի Ադրբեջանի կողմից օկուպացված հայկական բնակավայրեր, որպեսզի այնտեղ կանխվեն վայրագություններն ու գազանությունները»:
Բանախոսի խոսքերով՝ իրենք ԵԱՀԿ Մինսկի խմբի համանախագահներին բազմիցս կոչ են արել մոնիթորինգ անցկացնել նաև Գետաշենում և Շահումյանում, սակայն Մինսկի խումբը կողմնակալ վերաբերմունք է ցուցաբերել Ադրբեջանի նկատմամբ: Վերջում հավելեց, որ այդ հարցը պետք է քննարկվի և ստանա իր լուծումը:
