«Սննդի որակը և դրանում առկա միկրոէլեմենտների քանակը կարիեսի և նրա բարդությունների առաջացման գործում մեծ դեր են խաղում: Մանկական ստոմատոլոգների հիմնական խնդիրն է պայքարել այդ հիվանդությունների դեմ»,- լրագրողների հետ հանդիպմանը ասաց բժիշկ-օրթոդենտ Արթուր Փափազյանը:
Նրա խոսքերով՝ վերջին շրջանում ծնողները ավելի մտահոգ են դարձել. «Տարեցտարի նրանք ավելի հետևողական են դառնում և նույնիսկ ամենաչնչին խնդրի դեպքում դիմում են բժշկի: Այստեղ կարևոր է նշել, որ մանկական ստոմատոլոգների աշխատանքը շատ ծանր է, բայց քանակը՝ քիչ: Պետության աջակցությունը այս հարցում շատ կարևոր է: Գոնե մանկական ստոմատոլոգները պետք է աջակցություն ստանան պետության կողմից»:
Փափազյանը հավելեց, որ երեխաների մոտ կարիեսը համարվում է ամենատարածված հիվանդությունը, իսկ ինչ վերաբերում է դիմածնոտային անոմալիաներին, ապա Հայաստանում այն առկա է մարդկանց 70 տոկոսի մոտ:
«Երեխաների մոտ այն ի հայտ է գալիս 2 տարեկանից: Հիմա նման այցելությունները հաճախակի են դարձել, իսկ հիվանդության պատճառները կարող են տարբեր լինել: Հիմնական պատճառներից մեկը խանգարված քթային շնչառությունն է, որը բերում է դիմածնոտային մկանների ֆունկցիայի աղավաղման»:
Բժշկի հաղորդմամբ՝ կարևոր գործոն է նաև ժառանգականությունը. «Հղի կանայք պետք է գրագետ սնվեն , զերծ մնան սթրեսներից և գոնե 2 ամիսը մեկ այցելեն բժշկի»:
Վերջում բժիշկը խորհուրդ տվեց օրը երկու անգամ լվանալ ատամները, 2 ամիսը մեկ փոխել ատամի խոզանակը, մածուկի ընտրության հարցում կարող են լինել ազատ, իսկ բժշկի պետք է այցելեն գոնե 6 ամիսը մեկ:
