Moody’s վարկանիշային գործակալությունն իջեցրել է Կիպրոսի երկու խոշոր բանկերի վարկային վարկանիշը, հաղորդում է Agence France-Presse-ը: Գործակալության հաղորդագրության մեջ ասվում է, որ Կիպրոսյան բանկերը մեծ կորուստներ կունենան, եթե Հունաստանը դուրս գա եվրոգոտուց:
Այսպես, Bank of Cyprus-ի վարկանիշն իջեցվել է B1-ից B2, իսկ Hellenic Bank-ի վարկանիշը՝ B1-ից Ba3: Կիպրոսի խոշորագույն ֆինանսական հաստատությունների եռյակի մեջ մտնող Cyprus Popular Bank-ի վարկանիշը վերանայվում է, և հնարավոր է՝ իջեցվի:
Վերոնշյալ բոլոր երեք բանկերում տրված վարկերի մեծ մասը բաժին է ընկնում Հունաստանի բնակիչներին: Այսպես, Cyprus Popular Bank-ում հույներին բաժին է ընկնում ընդհանուր հատկացված վարկերի 42%-ը, Bank of Cyprus-ին՝ 34%-ը, իսկ Hellenic Bank-ին՝ 17%-ը: «Այսպիսով, Հունաստանի՝ եվրոգոտուց դուրս գալը ինչպես ուղղակի, այնպես էլ միջնորդավորված զգալի ազդեցություն կունենա կիպրոսյան բանկերի վրա»,- ասվում է Moody’s-ի հայտարարության մեջ:
Հունաստանի՝ եվրոգոտուց դուրս գալու հնարավորությունը գործակալությունը գնահատում է «զգալի»: Հունիսի 7-ին Հունաստանում անցկացվելիք խորհրդարանական ընտրությունների արդյունքները կարող են ավելի բարձրացնել իրադարձությունների նման զարգացման հնարավորությունը:
