Իռլանդիայի կառավարությունը ներում է շնորհել 5 հազար նախկին զինվորների, որոնք առանց թույլտվության Երկրորդ աշխարհամարտի տարիներին լքել էին չեզոքության մասին հայտարարած Իռլանդիայի բանակը և միացել բրիտանացիներին` նացիստական Գերմանիայի դեմ պայքարում։ Այս մասին հաղորդում է BBC-ն։
Իռլանդիայի պաշտպանության նախարար Ալան Շատերը հայտարարել է, որ այդ զինվորները կարևոր դեր են խաղացել ազատության և ժողովրդավարության հաստատման գործում։ Նա ներողություն է խնդրել Երկրորդ աշխարհամարտից հետո նրանց հետ այդպես վարվելու համար։ Այն ժամանակ կազմվել էին այս զինվորների սև ցուցակները, իսկ մոտ 5 հազար զինվոր դասալիք էր համարվել։ Արդյունքում սահմանափակվել էին նրանց իրավունքները, իսկ շատ պետական ձեռնարկություններ հրաժարվում էին այդ զինվորներին ընդունել աշխատանքի, նրանք նույնիսկ չէին կարողանում ստանալ զինվորական թոշակ։
