Բորիս Նեմցովին Ռուսաստանի քննչական կոմիտեի շենքից տարել են իր տուն` խուզարկություն անցկացնելու համար: Ինչպես Interfax գործակալությանը հայտնել է Նեմցովի փաստաբան Վադիմ Պրոխորովը, ընդդիմադիր գործչին տարել են իր տուն, որտեղ այժմ կատարվում է խուզարկություն:
Հիշեցնենք, որ նախօրեին քննիչները չէին կարողացել խուզարկել նրա տունը, քանի որ նա տանը չէր եղել: Այսօր Մոսկվայի կենտրոնում ցույցի ժամանակ Նեմցովին հաձնել են Ռուսաստանի քննչական կոմիտե ներկայանալու ծանուցագիր` կապված մայիսի 6-ին տեղի ունեցած անկարգությունների գործի հետ:
Առաջինն իր բնակարանի խուզարկության մասին հաղորդել էր բլոգեր Ալեքսեյ Նավալնին: Ավելի ուշ հայտնի էր դարձել, որ խուզարկվում է նաև հեռուստահաղորդավարուհի Քսենյա Սոբչակի տունը:
Հիշեցնենք, որ Բոլոտնայա հրապարակում մայիսի 6-ի իրադարձությունների կապակցությամբ հարուցվել է գործ՝ ՌԴ Քրեական օրենսգրքի 212 (զանգվածային անկարգություններին մասնակցելու) ու 318 (իշխանության ներկայացուցչի նկատմամբ բռնություն գործադրելու) հոդվածներով։
