Ինչպես հաղորդում է The Turkish Weekly-ն, Թուրքիայի արտաքին գործերի նախարար Ահմեդ Դավութօղլուն այս օրերին նույնպես գտնվում է Անվտանգության քաղաքականության հարցերով միջազգային 47-րդ համաժողովում եւ հանդիպել է Շվեյցարիայի, Ադրբեջանի, Ուկրաինայի և Ռումինիայի իր գործընկերների հետ:
Լրագրողները Դավութօղլուին հարց են ուղղել Եգիպտոսի արտաքին գործերի նախարարության խոսնակի հայտարարության վերաբերյալ, որը նշել էր, թե Թուրքիան կամ այլ պետություն իրավունք չունի միջամտելու Եգիպտոսի ներքին խնդիրներին: Այս հարցին պատասխանելով` Դավութօղլուն նշել է, որ դրա պատճառը Թուրքիայի մեծ հետաքրքրությունն է Եգիպտոսի նկատմամբ: Նա նշել է, որ Եգիպտոսը Թուրքիայի համար եղբայրական և գործընկեր պետություն է` պատմական լուրջ կապերով շղթայված: «Այս հայտարարությունները պետք չէ գնահատել որպես միջամտություն Եգիպտոսի ներքին գործերին: Եգիպտոսի բարօրությունը Թուրքիայի ռազմավարական նպատակներից մեկն է: Ցանկացած զարգացում տարածաշրջանում մեկը մյուսի հետ կապ ունի: Այնպես, ինչպես Թուրքիայի վրա ազդում են Եգիպտոսում տեղի ունեցող զարգացումները, նույնկերպ տարածաշրջանն ազդվում է այն զարգացումներից, որոնք տեղի են ունենում Թուրքիայում»,- շեշտել է Դավութօղլուն:
Դավութօլուն շվեյցարացի իր գործընկեր Միշլին Քալմի-Ռեյի հետ էլ քննարկել է հայ-թուրքական կարգավորման գործընթացը, ինչպես նաև Իրանի միջուկային խնդրի շուրջ ստեղծված իրավիճակը: Այսօր Դավութօղլուն կհանդիպի ԱՄՆ պետքարտուղար Հիլարի Քլինթոնի հետ:
«Առաջին լրատվականն» արդեն տեղեկացրել է, որ Դավութօղլուն հանդիպել է Ադրբեջանի արտաքին գերատեսչության ղեկավար Էլմար Մամեդյարովի հետ: