Նոր Նախիջևանի և Ռուսաստանի Հայոց Թեմի մամլո դիվանից «Առաջին լրատվական»-ին հայտնում են, որ հունիսի 9-ին Նոր Նախիջևանի և Ռուսաստանի Հայոց Թեմի Յակուտսկ քաղաքում Թեմակալ Առաջնորդ Տ.Եզրաս Եպիսկոպոս Ներսիսյանի ձեռամբ կատարվել է եկեղեցու հիմնօրհնեքի արարողություն:
Հիմնարկեքի ընթացքում Թեմակալ Առաջնորդը Տ. Հակոբ քահանա Սարոյանի հետ սրբալույս մյուռոնով օծել է տասնվեց խաչանիշ քարերը, որոնք եկեղեցու տասնվեց կնքահայրերը զետեղել են աղոթատան հիմքերում:
Հայկական ավանդական ճարտարապետական ոճով նախագծված եկեղեցին կառուցվելու է համայնքի հավատավոր հայորդիների բարերարությամբ:
Մեծաթիվ համայնքի հոգևոր պահանջները բավարարելու համար դեռևս 2001 թվականին Հայաստանից բերվել և ռուսական եկեղեցու բակում տեղադրվել էր մի խաչքար:Սակայն աղոթքի կանգնելու, եկեղեցու սրբազան արարողություններն ու խորհուրդներն իրականացնելու համար անհրաժեշտ էր կառուցել աղոթատուն:
Հիմնօրհնեքի արարողությունից հետո Սրբազան հայրն իր օրհնությունը բաշխել է ներկաներին և հույս հայտնել, որ նորակառույց եկեղեցին դառնալու է համախմբող, օրհնություն պարգևող օրրան:
-Աստծո կամքով և միասնական աղոթքով այսօր կատարեցինք նոր եկեղեցու հիմնարկեքի արարողությունը: Ձեր ներկայությունը և նախաձեռնած գործը խոսուն վկայությունն է մեր Սուրբ Եկեղեցու շուրջ ձեր համախմբվածության, պապերից ժառանգած նվիրական արժեքների նկատմամբ ձեր հավատարմության: Հայրենիքից հեռու այս երկրամասում կառուցելով ձեր հոգևոր տունը, որից ճառագվող կենդանարար լույսը պիտի օրհնաբեր կյանք պարգևի ձեզ և ձեր զավակներին, դուք մեկ անգամ ևս հաստատում եք Առաքել Դավրիժեցու խոսքերը` «Ի վերայ Աջոյն եւ Սրբոյ Էջմիածնի Ամենայն Ազգն Հայոց կապեալ կան»: Լինելով Աստվածասեր ու հայրենասեր հայորդիներ, դուք նաև արժանի և ազնիվ զավակներն եք ձեր երկրորդ հայրենիքի:Այսօրվա ուրախությունն ու ձեռքբերումը, որ շնորհ է ու պարգև մեզ Բարձրյալից, արդյունք է նաև այն աստվածահաճո վերաբերմունքի, որ դրսևորում են ՌԴ իշխանությունները` խղճի և կրոնի ազատության, հոգևոր զարթոնքի ծիրում:
Աստծո օրհնությունը ձեզ, ապրեք համերաշխ և խաղաղ` միշտ արթուն պահելով ձեր հոգիներում եկեղեցասիրության ոգին,- իր խոսքում ասաց Տ.Եզրաս Եպիսկոպոս Ներսիսյանը:
Հայաստանից բերված տուֆ քարով կառուցվող եկեղեցու շինարարարական աշխատանքները կավարտվեն երկու տարվա ընթացքում: Նախատեսվում է եկեղեցուն կից կառուցել նաև մշակութային կենտրոն: Արդեն մի քանի տարի է բարեհաջող լույս է տեսնում քաղաքի միակ հայկական պարբերականը`«Արմյանսկի վեստնիկ» թերթը:
Հեռավոր Յակուտիայում հայերն ապրում են դեռևս 1800-ական թվականներից:Նրանց թիվն այսօր հասնում է հինգ հազարի: Այստեղ հայերն հիմնականում զբաղվում են շինարարությամբ:
