ՀՀ նախագահական նստավայրի առջև այս պահին մեկնարկել է ամուսնու և սկեսրոջ կողմից դաժանաբար ծեծված Մարիամ Գևորգյանի գործի առնչությամբ բողոքի ակցիան:
«Ընդդեմ կանանց հանդեպ բռնության կոալիցիան» արդեն նախագահական է փոխանցել կոալիցիայի դժգոհությունը ինչպես Արարատի և Վայոց ձորի ընդհանուր իրավասության դատարանի դատավոր Արարատ Բեկթաշյանի գործողություններից, այնպես էլ պահանջ` Մարիամ Գևորգյանի գործով դատավարությունները բաց իրականացնելու մասին:
Կոալիցիան հիշեցնում է, որ Մարիամի սկեսուր Հայկանուշ Միքայելյանը հարսին խոշտանգել է որդու՝ Դավիթ Զիրոյանի հետ: Գևորգյանը Զիրոյանի հետ ամուսնացել է 2009 թ. նոյեմբերին, նույն տարվա դեկտեմբերին տեղափոխվել Սանկտ Պետերբուրգ, որտեղ աղջկան 10 ամսվա ընթացքում պարբերաբար ծեծի և կտտանքների են ենթարկել: Երևան վերադառնալուց հետո Գևորգյանը դիմել է ոստիկանություն, և ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որոնց համաձայն՝ նրան կարող էին դատապարտել մինչև 3 տարվա ազատազրկման: Սակայն դատարանի որոշմամբ Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի հայտարարած համաներմամբ: Իսկ սկեսուր Հայկանուշ Միքայելյանին առաջադրվել է մեղադրանք Քրեական օրենսգրքի 113 (միջին ծանրության վնասվածքներ հասցնել) և 119 (խոշտանգում) հոդվածներով:
Հիշեցնենք, որ Մարիամ Գևորգյանի գործով վերջին դատական նիստում Արարատի և Վայոց ձորի ընդհանուր իրավասության դատարանի դատավորը չի բավարարել իր ինքնաբացարկի մասին միջնորդությունը, որը նախորդ նիստում ներկայացրել էր տուժող կողմի ներկայացուցիչ Նոնա Գալստյանը:
Նշենք, որ չէր բավարարվել նաև տուժող կողմի միջնորդությունը` դատավարությունը հրապարակայնորեն անցկացնելու վերաբերյալ:
Նոնա Գալստյանը «Առաջին լրատվական»-ի հետ զրույցում դատարանի որոշումը անհիմն համարեց: Նրա խոսքով՝ իր կողմից ներկայացված բավական ծավալուն առարկություններին դատարանը որևէ ուշադրություն չի դարձրել: Իսկ դատաքննությունը դռնփակ անցկացնելու դատարանի որոշման պատճառաբանությունը հինգ-վեց նախադասությունից է եղել կազմված, որտեղ չի եղել որևէ հիմնավորում, թե ինչու են նման որոշում կայացրել:
Դատարանը հաջորդ նիստը նշանակել է հունիսի 14-ին:
