Թուրքական Doğan լրատվական գործակալության փոխանցմամբ՝ «Ազգայնական շարժում» կուսակցության (ԱՇԿ) առաջնորդ Դևլեթ Բահչելին լրագրողների հետ զրույցում անդրադարձել է Քրդական հարցի կարգավորմանը:
Բահչելին հիշեցրել է, որ ընդդիմադիր Ժողովրդա-հանրապետական կուսակցությունը (ԺՀԿ) 10 կետանոց առաջարկ է ներկայացրել իշխող «Արդարություն ու զարգացում» կուսակցության (ԱԶԿ) նախագահ, երկրի վարչապետ Ռեջեփ Էրդողանին՝ ընդգծելով, որ երկար ժամանակ է, ինչ որևէ տեղեկություն չկա 1999 թվականից Մարմարա ծովի Իմրալը կղզու բանտում պահվող քուրդ առաջնորդ Աբդուլլահ Օջալանից:
Ելնելով դրանից՝ Բահչելին կասկած է հայտնել, որ Օջալանը ցայժմ գտնվում է Իմրալըի բանտում: Ապա Բահչելին հեռակա կարգով դիմել է Էրդողանին՝ հարցնելով, թե արդյոք Օջալանը գտնվո՞ւմ է Իմրալըի բանտում:
Հիշեցնենք, որ նախորդ տարվա օգոստոսի 17-ին Ստամբուլի դատարանը PKK-ին աջակցելու համար Օջալանին 1 տարի ժամկետով արգելել էր հանդիպումներ ունենալ իր փաստաբանների հետ, որոնց միջոցով նա տարբեր հայտարարություններ էր հնչեցնում: Օջալանի փաստաբանները վերջին անգամ նրա հետ հանդիպել են 2011 թվականի հուլիսի 27-ին և այս տարվա ապրիլի վերջի դրությամբ՝ ստացել են Օջալանի հետ հանդիպելու 67-րդ մերժումը: Ի դեպ, Օջալանին բանտում պահելը թուրքական պետությանը տարեկան արժենում է 25 միլիոն դոլար:
