Ցմահ ազատազրկման դատապարտված Եգիպտոսի նախկին նախագահ Հոսնի Մուբարաքը դիմել է Տորա բանտի ղեկավարությանը՝ խնդրելով իր մոտ՝ հիվանդասենյակ բերել ավագ որդուն՝ Ալային: Այս մասին հաղորդում է RIA Novosti-ն՝ վկայակոչելով Եգիպտոսի ՆԳՆ ներկայացուցչին:
Մուբարաքն իր խնդրանքը հիմնավորել է իր առողջության վատթարացմամբ և հայտնել, որ ցանկանում է, որպեսզի երկու որդիներն են լինեն իր կողքին: Նրա կրտսեր որդին՝ Գամալը, իր խցից տեղափոխվել է Տորա բանտի հիվանդանոց, որտեղ պահվում է նախկին նախագահը:
Բանտի բժշկական անձնակազմի տվյալներով՝ Մուբարաքի վիճակն արդեն մի քանի օր է՝ կայուն ծանր է: Ավելի վաղ հաղորդվում էր, որ Մուբարաքը լուրջ խնդիրներ ունի շնչառության հետ կապված:
Մուբարաքի հարազատները փորձում են ՆԳՆ-ից թույլտվություն ստանալ նրան տեղափոխելու ժամանակակից բժշկական հաստատություն, որտեղ, նրանց կարծիքով, հնարավոր կլինի կայունացնել Մուբարաքի դրությունը: Նախարարությունը, սակայն, մինչ այժմ խուսափում է նման թույլտվությունից՝ հայտարարելով, որ այդ հարցը դեռ քննարկվում է: