«Նարինջ ուտողների հետ կապված Հրայր Կարապետյանը աղավաղել է: Խոսքը վերաբերել է անհատ մարդկանց, որոնք, մեղմ ասած, ախմախ գաղափարներ էին առաջ քաշում: Դա ամբողջ սփյուռքին չէր վերաբերում, այլ անհատ մարդկանց»,- անդրադառնալով այսօր դաշնակցական Հրայր Կարապետյանի այն արտահայտությանը, թե Լևոն Տեր-Պետրոսյանը սփյուռքահայերին անվանել է «նարինջ ուտողներ», «Առաջին լրատվականի» հետ զրույցում կարծիք հայտնեց Հայ ազգային կոնգրեսի կենտրոնական գրասենյակի անդամ Աշոտ Սարգսյանը:
Սարգսյանը, խոսելով երկպալատ խորհրդարան ստեղծելու գաղափարի մասին, ասաց, որ դա պետականություն և անկախություն ոչնչացնելու հերթական մտահղացումն ու քայլն է.
«Խոսել դրա մասին որպես քաղաքական երևույթի, կնշանակի դրան թեկուզ մի տոկոս ինչ-որ կշիռ կամ լրջություն տալ: Դրա մասին ես մեծ հաճույքով այլ շրջապատում կխոսեի հայհոյանքով»:
Սարգսյանը նշեց, որ սա ամենևին էլ սփյուռքի կարծիքը և ցանկությունը չէ, ինչպես եղավ երկքաղաքացիության դեպքում: Սարգսյանի կարծիքով, սա հերթական բլեֆն է, որը հիմա կարող է ծառայել քարոզչական նպատակներով.
«Ցանկանում են ինչ-որ մի խնդիր ստեղծել, որի շուրջ բոլորը կսկսեն խոսել, ես չեմ գտնում, որ դրա մասին արժե խոսել, դա ընդամենը հայհոյանքի արժանի գաղափար է»: