Փետրվարի 4-ին տեղի ունեցավ ՀՀ ոստիկանության կոլեգիայի նիստ, որը վարում էր ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանը:
Կոլեգիայի աշխատանքներին մասնակցում էր ՀՀ ազգային անվտանգության խորհրդի քարտուղար Արթուր Բաղդասարյանը:
ՀՀ ոստիկանության ծառայությունների և տարածքային մարմինների 2010թ. օպերատիվ-ծառայողական գործունեության արդյունքների մասին զեկուցումով հանդես եկավ ՀՀ ոստիկանության պետի առաջին տեղակալ, ոստիկանության գեներալ-մայոր Հունան Պողոսյանը:
Նշվեց, որ հաշվետու ժամանակահատվածում շարունակվել է ակտիվ աշխատանքը լատենտային բնույթ կրող հանցագործությունների հայտնաբերման, ինչպես և հանցագործությունները հաշվառումից թաքցնելու արատավոր գործելաոճը բացառելու ուղղությամբ, ինչը արտահայտվել է հանրապետությունում գրանցված հանցագործությունների ընդհանուր թվաքանակի աճով՝ 7,9%-ով կամ 1,138 դեպքով (2009 թ.` 14,339, 2010թ.` 15,477):
Հանցագործությունների թվաքանակի աճը հիմնականում պայմանավորված է նրանով, որ 3,933 հանցագործության դեպք, կատարված լինելով նախկին տարիներին, ոստիկանության ջանքերով հայտնաբերվել և հաշվառման է վերցվել հաշվետու տարվա ընթացքում (2009 թ.՝ 3113):
2,1%-ով նվազել է ծանր և առանձնապես ծանր հանցագործությունների թիվը (2009 թ.` 5,417, 2010 թ.` 5,304): Նվազել է այնպիսի հիմնական հանցատեսակների թիվը, ինչպիսիք են` սպանությունը (2009 թ.` 68, 2010 թ.` 41), սպանության փորձը (2009 թ.` 29, 2010 թ.` 27), դիտավորությամբ առողջությանը վնաս պատճառելը (2009 թ.` 1436, 2010 թ.` 1353), այդ թվում ծանր (2009 թ.` 181, 2010 թ.` 167), բռնաբարությունը և բռնաբարության փորձը (2009 թ.` 21, 2010 թ.` 15), մահվան ելքով ճանապարհատրանսպորտային դեպքերը (2009 թ.` 187, 2010թ.` 182), ինչպես և ավազակության (2009 թ.` 151, 2010 թ.` 107), կողոպուտի (2009 թ.` 265, 2010 թ.` 249), գողության (2009 թ.` 3961, 2010 թ.` 3664), յուրացման կամ վատնման (2009 թ.` 182, 2010 թ.` 155) դեպքերը:
2010 թ. հայտնաբերվել է թմրամիջոցների ապօրինի շրջանառության 1518 դեպք, ինչը նախորդ տարվա նույն ժամանակահատվածի համեմատությամբ աճել է մոտ մեկ քառորդով: Առգրավվել է 59 կգ 360 գրամ մարիխուանա, 29 կգ մետամֆետամին, 8 կգ 850 գրամ ափիոն, 6 կգ 900 գրամ հերոին, և այլն:
Հայտնաբերել է տնտեսական գործունեության դեմ ուղղված 896 հանցագործության դեպք (2009 թ.` 696):
Հաշվետու ժամանակահատվածում հայտնաբերվել է նաև կոռուպցիոն բնույթի 638 հանցագործության դեպք, ինչը 16,0%-ով ավելի է, քան 2009 թ. ցուցանիշը` 550, ընդ որում նշված հանցագործություններից 469-ը կամ 85,2%-ը ի հայտ է բերվել ոստիկանության մարմինների կողմից: Կոռուպցիոն բնույթի հանցագործություններից 60-ը կաշառակերության դեպքեր են (2009 թ.` 56), որոնցից 54-ը հայտնաբերվել է ոստիկանության ջանքերով:
Ավելի քան մեկ երրորդով նվազել է հրազենի գործադրմամբ կատարվող հանցագործությունների թիվը (2009 թ.` 100, 2010 թ.` 66): Արձանագրվել է զենքի և ռազմամթերքի ապօրինի շրջանառության 475 դեպք, ինչը 14,5%-ով ավելի է, քան նախորդ տարում (2009 թ.` 415): Ապօրինի շրջանառությունից առգրավվել է 354 միավոր հրազեն, իսկ բնակչության շրջանում տարված բացատրական աշխատանքի շնորհիվ կամավոր հանձնվել է 654-ը:
ՀՀ ազգային անվտանգության խոհրդի քարտուղար Արթուր Բաղդասարյանն իր ելույթում անդրադարձավ ոստիկանության համակարգում ընթացող բարեփոխումների հիմնական ուղղություններին, որոնք կանխանշված է իրականացնել 2011 թ. ընթացքում:
Ելույթներով հանդես եկան ՀՀ ոստիկանության կոլեգիայի անդամներ և ստորաբաժանումների ղեկավարներ:
Կոլեգիայի նիստում նշվեց, որ 2010 թվականը ՀՀ ոստիկանության համար հատկանշական էր համակարգի բարեփոխումների մեկնարկով, որոնց վերջնարդյունքում ակնկալվում է ունենալ միջազգային չափանիշներին համապատասխան և բնակչության համընդհանուր հարգանքն ու վստահությունը վայելող ոստիկանություն:
Ամփոփելով կոլեգիայի աշխատանքները` ՀՀ ոստիկանության պետ, ոստիկանության գեներալ-լեյտենանտ Ալիկ Սարգսյանը նշեց, որ հանրապետությունում օպերատիվ իրավիճակը վերահսկելի է, և ոստիկանությունը հետայսու ևս պետք է ձեռնարկի անհրաժեշտ բոլոր միջոցները՝ հանցավորության դեմ պայքարի արդյունավետությունն էլ ավելի բարձրացնելու, անձնակազմի շրջանում օրինականությունն ու կարգապահությունն ամրապնդելու ուղղությամբ:
Ոստիկանություն
