Հայաստանը ստանձնել է ԼՂՀ պաշտպանի դերը, և որևէ մեկը չի կարող նրան դուրս մղել բանակցային գործընթացից: Այսօր կայացած մամուլի ասուլիսի ժամանակ այս մասին ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը:
«Բայց անկեղծ լինենք. ԼՂՀ-ն բանակցային գործընթացից դուրս բերելը ՀՀ երկրորդ նախագահի ձեռքի գործն է: Սա ռազմավարական լուրջ սխալ էր»,- ասաց նա:
Կիրակոսյանի խոսքով՝ Ադրբեջանի նավթային ռեսուրսները սպառվում են: Դրան զուգահեռ՝ Հայաստանի ռազմավարական կարևորությունը գնալով աճում է, իսկ Ադրբեջանինը՝ նվազում: «Այդ երկիրը միջազգային հանրության պատիժներից խուսափում է միայն նավթային ռեսուրսների ու իր աշխարհագրական դիրքի շնորհիվ: Միաժամանակ, Ադրբեջանը ներքին բազմաթիվ խնդիրներ ունի, սակայն ամեն բան անում է՝ միջազգային հանրությունից դրանք թաքցնելու համար»,- ասաց նա:
Ամփոփելով՝ Ռիչարդ Կիրակոսյանը կարծիք հայտնեց, որ հայ-ադրբեջանական հնարավոր պատերազմ կարող է սկսվել 2014 թվականին, երբ զինադադարի 20-ամյա ժամկետը վերջանա, և հոգեբանական առումով, որպես 20-ամյա իրողության ավարտ, իրավիճակն այդ երկրին նոր գործողության՝ պատերազմի կդրդի:
«Պատերազմի մյուս պատճառ կարող է լինել Ադրբեջանի նավթային ռեսուրսների սպառվելը, այդ երկրի կողմից սպառազինվելը և 2014-ին Սոչիում կայանալիք խաղերի ժամանակ միջազգային հանրության՝ այդ ուղղությամբ ուշադրության շեղումը:
Բացի այդ, Ադրբեջանի ուղերձն այն է, որ եթե մինչև 2014 թվականը որևէ առաջընթաց չլինի, նա պատերազմի կգնա: Սա նոր ռազմական գործողությունների պլան է, սակայն չի նշանակում, որ կարող է միանշանակորեն գործել: Միջազգային հանրության գնահատականը սրան խիստ կոշտ կլինի»,- ասաց նա: