15:38 Եգիպտոսի երրորդ ամենամեծ քաղաքում մոտ 3,000 ցուցարարներ ցույց են կազմակերպել ի պաշտպանություն Մուբարաքի: Կահիրեում նրանք այսօր ոչ մի միջոցառում չեն կազմակերպել:
15:31 Անսպասելի հայտարարությամբ հանդես է եկել Իտալիայի վարչապետ Սիլվիո Բեռլուսկոնին, ով ասել է, որ Հոսնի Մուբարաքն Արևմուտքում համարվում է ամենաիմաստուն մարդկանցից մեկը և չափանիշ: Reuters-ի փոխանցմամբ, նա ասել է, որ հույս ունի` անցումը ավելի ժողովրդավարական համակարգի չի իրականանա նախագահ Մուբարաքի ստեղծածը քանդելու հաշվին. «Ես հույս ունեմ, որ կառավարությունում շարունակականություն կապահովվի»:
14:59 Al-Jazeera-ի լրագրողը նշում է, որ բոլոր բացականչում են, որ չեն հեռանալու հրապարակից, քանի դեռ Մուբարաքն ինքը չի հեռացել: Ամենատարածված բացականչությունն է «Նա հեռանում է»:
14:47 Ինչպես հաղորդում է Al-Jazeera-ի լրագրողը Ալեքսանդրիայից, քաղաքի կենտրոնում հավաքվել են տասնյակ հազարավոր ցուցարարներ, որոնք պահանջում են Մուբարաքի հրաժարականը: Այսօր քրիստոնյաները պատարագ չեն մատուցել, այլ կենդանի շղթա են կազմել հրապարակի կենտրոնում հավաքված մուսուլմանների շուրջ, որոնք աղոթում են հենց հրապարակում, որպեսզի պաշտպանեն վերջիններիս հնարավոր սադրանքներից:
14:37 Իրավիճակը Թահրիրում հանգիստ է: Այն գրեթե ամբողջությամբ լցվել է: Տեղեկություններ կան, որ երթ դեպի նախագահական նստավայր չի լինելու, սակայն ընդդիմադիրներն այս լուրը դեռ չեն հաստատել:
14:23 Պաշտպանության նախարար Տանտաուին ելույթ է ունեցել Թահրիրում հավաքվածների առաջ` հայտարարելով, որ այդ մարդը (Մուբարաքը) կատարել է այն, ինչ նրանք ցանկացել են: Ցուցարարները նրան դիմավորել են «Բանակն ու ժողովուրդը միասին են» բացականչություններով: Տանտաուին ստուգել է, թե ինչպես են զինվորներն իրականացնում անվտանգության ապահովման գործողությունները:
14:20 Բրյուսելում այս ժամերին Եվրոպայի Միության անդամ երկրների ղեկավարները քննարկում են Եգիպտոսում ստեղծված իրավիճակը, ինչպես նաև միջազգային ջանքերը` ուղղված այդ խնդրի կարգավորմանը:
Մեծ Բրիտանիայի վարչապետ Դևիդ Քեմերոնը հանդիպումից առաջ ասել է, որ Եգիպտոսի իշխանությունը պետք է հենց հիմա իրականացնի իշխանությունը փոխանցելու գործընթացները: «Այն, ինչ մինչև հիմա նրանք արել են, չի արժանացել ժողովրդի հավանությանը: Եթե մենք այսօր տեսնենք, որ Կահիրեի փողոցներում պետության կողմից հովանավորվող խմբերը բռնություններ կիրառեն ցուցարարների դեմ, ապա գործող ռեժիմը կկորցնի դեռ ունեցած վստահությունը համաշխարհային հանրության աչքում, այդ թվում՝ նաև Մեծ Բրիտանիայում»,- ասել է Քեմերոնը: Այս մասին հաղորդում է BBC-ն:
Associated Press գործակալության հաղորդմամբ, հանդիպումից առաջ Գերմանիայի կանցլեր Անգելա Մերկելը նշել է, որ իշխանությունները պետք է ապահովեն «խաղաղ և ազատ» ցույցերի իրավունքը: Իսկ ԵՄ արտաքին գերատեսչության ղեկավար Քեթրին Էշթոնն էլ նշել է, որ նկատելի են որոշակի մերձեցման գործընթացներ երկու կողմերի դիրքորոշումների մեջ:
Այս պահին տասնյակ հազարավոր ցուցարարներ հավաքվել են Թահրիր հրապարակում: Շատ ավելին սպասվում է ամեն ուրբաթ տեղի ունեցող աղոթքից հետո: Al-Jazeeraի հաղորդմամբ, զինվորականությունը փակել է մուտքերը դեպի Թահրիր և մարդկանց մուտքը հրապարակ թույլատրում է փոքր խմբերով: Նույն հեռուստաընկերությունը նաև հայտնում է, որ ընդդիմությունը մուտքերի մոտ ստուգում է մարդկանց նույնականացման քարտերը, որոնց վրա նշվում է նաև մարդու մասնագիտությունը: Դրանով նրանք փորձում են ներս չթողնել ոստիկան սադրիչներին, որոնք քաղաքացիական հագուստով ներխուժելով հրապարակ` կարող են անկարգություններ հրահրել:
Տեղեկություններ կան նաև, որ հրապարակ է պատրաստվում գալ Եգիպտոսի պաշտպանության նախարար Մարշալ Մուհամադ Հուսեյն Տանտաուին: Նրա՝ Թահրիր գալու նպատակների մասին դեռ տեղեկություններ չեն հայտնվում:
Եգիպտոսում անկարգությունները սկսվելուց հետո շատ էր քննարկվում Իսրայելի նկատմամբ Եգիպտոսի արտաքին քաղքականության փոփոխության հարցը: «Առաջին լրատվականը» երեկ տեղեկացրել էր, որ «Մուսուլման եղբայրներ» կազմակերպությունը հայտարարել էր, որ իշխանափոխությունից հետո անհրաժեշտ է խզել հարաբերություններն Իսրայելի հետ և չեղյալ հայտարարել 1979 թ. խաղաղության պայմանագիրը:
Այսօր ABC-ին տված հարցազրույցում գործող փոխնախագահ Օմար Սուլեյմանը շտապել է հանգստացնել, որ այդ պայմանագիրը չի խզվում, իսկ Եգիպտոսն էլ չի պատրաստվում խախատել դրա պայմանները: