«2012թ. մայիսին ապրիլի համեմատ արձանագրվել է սպառողական գների 1.3 տոկոսանոց նվազում: Պարենային ապրանքների գները նվազել են 2.6 տոկոսով, ոչ պարենային ապրանքների գները աճել են 0.2. տոկոսով, իսկ ծառայության սակագները աճել են 0.1 տոկոսով»,- այս մասին լրագրողների հետ հանդիպմանը ասաց ՀՀ ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը:
Նա նշեց, որ 2011 թվականի նույն ժամանակահատվածի համեմատ գնաճը կազմել է 0.5 տոկոս՝ այդ թվում պարենային ապրանքների գները նվազել են 1.6 տոկոսով, ոչ պարենայինը՝ աճել են 4 տոկոսով, ծառայության սակագները աճել են 1.7 տոկոսով. «2012 թվականի հունվար-մայիս ամիսների սպառողական գների ինդեքսը 2.5 տոկոս է կազմել»:
Մարտիրոսյանի խոսքերով՝ վերջին մեկ ամսում նկատվել են հետևյալ գնային փոփոխությունները՝ հացամթերքի գները մնացել են նույնը, մսամթերքինը նվազել է 0.2 տոկոսով, ձկնամթերքինը՝ 0.7 տոկոսով, կաթնամթերքինը 2.2 տոկոսով, ձվի գները՝ 2 տոկոսով, կենդանական և բուսական յուղինը՝ 0.4 տոկոսով, մրգինը՝ 0.3 տոկոսով, շաքարավազինը՝ 1.2 տոկոսով.
«Մեծ գնանկում է արձանագրվել բանջարեղեն և կարտոֆիլ ապրանքախմբում՝ 15.5 տոկոս: Մայիսին, ապրիլի համեմատ, ամենացածր գնանկումը նկատվել է Թալինում՝ 0.6 տոկոս, ամենաբարձրը՝ Մարտունիում՝ 2.8 տոկոս, Երևանում՝ 1.1 տոկոս»:
Խոսելով գնաճի մասին՝ նա ասաց, որ գնաճ է արձանագրվել 4 ապրանքախմբերում՝ 0.1 և 0.2 տոկոսի սահմաններում. «0.1տոկոս՝ սուրճ, թեյ, կակաո և այլ մթերքներ: Իսկ ոգելից խմիչքի և ծխախոտի գներն աճել են 0.2 տոկոսով»:
Սպառողական գների դիտարկումը իրականացվում է ամիսը երեք անգամ՝ 1-ին, 10-ին, 20-ին:
