2005 թվականից «Քաղցկեղի դեմ պայքարի միջազգային միությունը», առողջապահության համաշխարհային կազմակերպության աջակցությամբ, փետրվարի 4-ին նշում է քաղցկեղի դեմ պայքարի համաշխարհային օրը, որի նպատակն է հասարակության, պետական գործիչների և առողջապահական ոլորտի պատասխանատուների ուշադրությունը հրավիրել քաղցկեղի հետ կապված խնդիրներին:
Ամեն տարի ողջ աշխարհում քաղցկեղով հիվանդանում է 12.5 միլիոն մարդ: Այդ հիվանդությունից ամեն տարի մահանում է մոտ 7.5 միլիոն մարդ: Հայաստանում ամեն տարի գրանցվում է 2.3 տոկոս աճ: 2010 թվականին նախորդ տարվա համեմատ գրանցվել է մոտ 2 տոկոս աճ:
«2009 թվականին քաղցկեղով հիվանդացել է 7650 մարդ, մահացել՝ 5000-ը: Բուժման հիմնական ձևերն են վիրահատությունները, դեղորայքային բուժումը, ճառագայթային բուժումը, ինչպես նաև հորմոնային բուժումը, իմոնոթերապիան»,- լրագրողների հետ հանդիպման ժամանակ նշեց ուռուցքաբան Գագիկ Բազիկյանը: Հայաստանում քաղցկեղի ախտորոշում ունի մոտ 31 հազար մարդ, 5 տարի առաջ բուժվել են 15,200-ից ավելի հիվանդներ, որոնք այսօր պրակտիկորեն առողջ են: Քաղցկեղի բուժման առաջին պայմանը դրա վաղ հայտնաբերումն է:
