Մայրաքաղաքում տներով շրջում են մարդիկ¸ ովքեր ներկայացնելով իրենց որպես լույսի, ջրի կամ աղբի «մարդ» ինչ- որ ցուցակ ձեռքներին պահանջում են մուծումներ անել¸ սակայն բազմաթիվ բնակիչներ բախվել են այն իրականությանը¸ որ մուծելով գումարներ, հետո հասկացել են, որ այն ջուրն են գցել:
Իսկ իրականում այս մարդիկ մինչեւ որոշակի համայնքի բնակարաններ հաճախելը մանրամասն ճշտում են, թե ովքեր են տարածքի բնակիչները եւ հիմնականում դիմում են տվյալ տարածք նոր տեղափոխված բնակիչներին, ովքեր առայժմ դեմքով չեն ճանաչում իրենց լույսի, ջրի եւ գազի «մարդուն»: Արդեն մի քանի տարի է, թե հանրապետության մարզերում, թե մայրաքաղաքում բնակիչները բարձրաձայնում են խնդրի մասին, սակայն իրենք էլ ենթարկվում են խաբեությանը:Նշենք, որ այս մարդիկ հավատ ներշնչելու եւ վստահություն առաջացնելու համար տրամադրում են նաեւ ինչ-որ անօրինական չեկեր, որոնց վրա հիմնականում բնակիչները ուշադրություն էլ չեն դարձնում:
Ի դեպ, տեղեկություններ կան, որ խաբեբաների մի խումբ համապատասխան հագուկապով շրջում է հանրապետության խանութներում եւ ներկայանում որպես հարկային տեսչության աշխատակից: Այս մարդիկ եւս քաջ ծանոթ լինելով տարածքի հիմնականում փոքր խանութներին ու կրպակներին, եւ իմանալով դրանցից յուրաքանչյուրում առկա ՀԴՄ-ի հետ կապված խախտումների մասին, օգտվում են առիթից եւ բավական խոշոր գումարներ շորթում վախեցած խանութպաններից:
