Այսօր Լոնդոնում անցկացվում է թագուհու գահակալության առիթով հունիսի 2-5 կայանալիք տոնական միջոցառումների գլխավոր փորձը: Ցամաքային, օդային և ծովային զինուժի հազարավոր զինծառայողներ այսօր մայրաքաղաքում են եղել՝ վերջին պատրաստությունների համար: Մոլ պողոտայում փորձի ժամանակ հնչել է Մեծ Բրիտանիայի ազգային հիմնը ՝ «Աստված պահպանի մեր թագուհուն», որոտացել է զինվորականների՝ միապետին ուղղված 3 համազարկային ողջույնը:
Էլիզաբեթ II-ի գահակալությունը հունիսի 3-ին կնշեն վերջին 300 տարում ամենախոշոր նավերի շքերթով: 1000 նավեր այդ օրը կիջեցվեն մայր գետ՝ Թեմզա: Թագուհու պատվին վերջերս կառուցված 64 մետրանոց նավը կզարդարվի ալ կարմիր կտորներով և միապետի այգու ծաղիկներով:
Այդ օրը ամբողջ Մեծ Բրիտանիայում կանցկացվի «Մեծ հոբելյանական ընթրիք: Բրիտանացիները կխմբվեն փողոցներում բացված սեղանների շուրջ: Մայրաքաղաքում ամենամեծ տոնական սեղանը՝ նախատեսված 500 հոգու համար, կբացվի Պիկադիլլի փողոցում: Սակայն 800 հյուրերով ռեկորդայինը կլինի Գրինվիչում՝թագավորական ռազմածովայի քոլեջի մոտ բացվելիք սեղանը:
Լոնդոնում և ողջ Միացյալ թագավորությունում կանցկացվի միաժամանակ 10 հազար տոնական երեկո: Սպասվում է, որ միջոցառումներին կմասնակցի Միացյալ թագավորության բնակչության կեսը՝ 31 միլիոն մարդ:
Տոնակատարությունները կավարտվեն հունիսի 5-ին՝ սուրբ Պողոսի տաճարում տոնական արարողությամբ:
