Հայաստանի լիբերալ կուսակցության նախագահ Հովհաննես Հովհաննիսյանը, վերլուծելով արաբական աշխարհում տեղի ունեցող հեղափոխությունները, «Առաջին լրատվական»-ի հետ զրույցում կարծիք հայտնեց, որ մարդիկ հոգնել են բռնապետություններից, իշխող նույն դեմքերից:
Հովհաննես Հովհաննիսյանի դիտարկմամբ, տեղի ունեցող գործընթացները շարունակական են: Մեր զրուցակիցը հիշեցնում է, որ Հայաստանում տասներեք տարի է, ինչ բռնազավթվում է իշխանությունը, ազգային հարստությունը կուտակվել է մեկ տասնյակը չգերազանցող մարդկանց ձեռքում, ժողովուրդը շարունակվում է հարստահարվել:
Նրա կարծիքով, Հայաստանում ստեղծվել են բոլոր նախադրյալները, որպեսզի Հայաստանում հասունանա սոցիալական պայթյուն: Հովհաննես Հովհաննիսյանն ուշադրություն է հրավիրում այն փաստի վրա, որ, եթե Եգիպտոսում և մյուս երկրներում, ուր սկսվել են հեղափոխություններ, նոր-նոր են ձևավորվում շարժումներ, ապա Հայաստանում այդ հարցը լուծված է, և գոյություն ունի ինստիտուցիոնալացված ընդդիմություն, որը պատկերացնում է Հայաստանի և Լեռնային Ղարաբաղի անվտանգությանը սպառնացող խնդիրները:
