Մերձավոր Արևելքում սկսված հեղափոխական շարժումները դոմինոյի էֆեկտով շարժվում են առաջ և վարակում նաև այլ երկրներ: «Ղարաբաղ» կոմիտեի անդամ Աշոտ Մանուչարյանի կարծիքով, այս գործընթացները որոշակիորեն բարձրացնելու են նաև մի շարք երկրների դերակատարությունը:
«Առաջին լրատվական»-ի հետ զրույցում Մանուչարյանը կարծիք հայտնեց, որ «Հիզբոլլահը» Իրանի ծնունդ համակարգ է, և դրանով իրանական հեղափոխության շունչը տարածվեց մուսուլմանական աշխարհի վրա: «Իրանի ազդեցությունը էապես բարձրանում է այսօր, որովհետև նա այս բոլոր իրադարձությունների մեջ խաղում է այն դերը, ինչ որ 19-20-րդ դարերում սոցիալիստական շարժումների մեջ՝ Մարքսը:
Ինչ-որ իմաստով Իրանն այս ամենի հիմնադիր հայրն է, բացի դրանից, Իրանը նաև բավականին կազմակերպված և կազմակերպիչ ուժ է»:
Մանուչարյանի դիտարկմամբ, Իրանի դերը ոչ միայն կտրուկ բարձրանում է, այլև կտրուկ բարձրացել է արդեն:
«Ես համոզված եմ, որ Արևմուտքը Իրանի հետ գաղտնի հարաբերություններ է ստեղծել, դժվարանում եմ ասել, ով է հաջողակը, բայց այդ պայմանավորվածությունը զգացվում է, և կարծում եմ, որ դրանք ընդլայնվելու են»,- ասաց «Ղարաբաղ» կոմիտեի անդամը:
Մանուչարյանի գնահատմամբ, Բարադեի մասին խոսակցությունները, Արևմտյան գերտերությունների կողմից թունիսյան հեղափոխության ողջունումը վկայում են այն մասին, որ ինչ-որ համակարգեր փորձում են համադրել այս իրավիճակը՝ շատ լավ հասկանալով, որ աշխարհը դուրս է գալիս մի վիճակից և անցում է կատարում մեկ այլ վիճակի:
