«Ընտրական օրենսգրքի» փոփոխություններին վերաբերող մամուլի ասուլիսի ժամանակ Քաղաքագետների միության նախագահ Հմայակ Հովհաննիսյանը կարծիք հայտնեց, որ պետք է նախ պարզել, թե ինչ խնդիր պետք է լուծվի «Ընտրական օրենսգիրքը» փոփոխելով:
«Եթե չհաջողվի վերականգնել քաղաքացիների վստահությունը ընտրական ինստիտուտի նկատմամբ, դա կնշանակի, որ հայկական ժողովրդավարությունը ձախողվել է»,- ասաց Հմայակ Հովհաննիսյանը:
Նա հիշեցրեց, որ, որպես կանոն, ընտրությունները Հայաստանում ամրագրում են մինչ այդ գոյություն ունեցող վիճակը: Միակ բացառությունը, ըստ քաղաքագետի, եղել է 1999 թ., երբ իշխանության մեջ գտնվող թևերից մեկը, կազմելով «Միասնություն» դաշինքը, փոխեց առկա վիճակը:
ԱԺ «Ժառանգություն» խմբակցության պատգամավոր Արմեն Մարտիրոսյանն էլ նշեց, որ «Ընտրական օրենսգիրքը» պետք է համապատասխանի երեք չափանիշների`ընտրությունները պետք է անցկացվեն ազատ, արդար և թափանցիկ: Նա հիշեցրեց, որ ԵԽԽՎ բանաձևերում նշված է, որ նոր «Ընտրական օրենսգիրքը» պետք է կազմվի իշխանության և ընդդիմության համագործակցության արդյունքում:
Արմեն Մարտիրոսյանը նշեց, որ նոր «Ընտրական օրենսգրքի» աշխատանքներին ընդդիմությունը չի մասնակցել, և նրա մերժումը հիմնավոր է: Նա կարծիք հայտնեց, որ իշխանությունը նպատակ ունի ընդդիմությանը ներգրավել աշխատանքային խմբում, որպեսզի լեգիտիմացնի «Ընտրական օրենսգրքի» փոփոխությունները:
Իսկ այդպիսով, ըստ Արմեն Մարտիրոսյանի, տեղի են ունենալու իմիտացիոն գործընթացներ, որոնց հետևանքով էլ ունենալու ենք այն ընտրությունները, որոնք տեղի են ունեցել մինչ այժմ: