«ԵԽԽՎ ձմեռային նստաշրջանում միանշանակ ստացանք վատ արդյունք: Այսինքն` մեր պատվիրակները լավ չեն աշխատել»,- ԵԽԽՎ-ում Ղարաբաղի հարցով ենթահանձնաժողովի ստեղծման մասին խոսելով` ասաց ԼՂ նախկին արտգործնախարար Արման Մելիքյանը:
Ըստ բանախոսի` ՀՀ-ն, բացի Մինսկի խմբից, պետք է լրացուցիչ գործողություններ ստանձնի:
«Հավանաբար, այլ տարբերակ չենք ունենա՝ բացի բոյկոտելուց, ինչը միշտ վատ է և, ըստ էության, անպտուղ, քանի որ համանախագահները ևս կողմ են քվեարկել ենթահանձնաժողովի ստեղծմանը: Եթե մենք այլ գործողությունների դիմած լինեիք, լրացուցիչ խաղաքարտ կունենայինք հիմա»,- ասում է Ա. Մելիքյանը:
Ասուլիսի մյուս բանախոսը` ՀՀԿ ԱԺ խմբակցության անդամ Արտակ Դավթյանը, ավելի լավատես է այս հարցում.
«ԵԽԽՎ շատ շուտով կբացահայտի, որ ենթահանձնաժողովն անարդյունավետ է, ու կդադարեցնի դրա գործունեությունը»:
Ըստ նրա` Ղարաբաղի հարցով ենթահանձնաժողովը նոր գաղափար չէ, քանի որ ստեղծվել է 2005 թ., և մեր պատվիրակների մեղքով չէ այն այժմ վերաբացվում։
Փոխարենը, Ա. Դավթյանը կարծիքով, մեր պատվիրակությունը մեծ հաղթանակ է տարել` Ղարաբաղի անկախության մասին հայտարարության համար 22 երկրի ստորագրությունը ստանալով:
Ինչպես արդեն տեղեկացրել ենք, այդ նախաձեռնության հեղինակը ԱԺ «Ժառանգություն» խմբակցության անդամ Զարուհի Փոստանջյանն է: