Նավթի գները միջազգային շուկաներում վերջին երկու տարվա մեջ առաջին անգամ երկուշաբթի օրը անցան 100 դոլարի սահմանը 1 բարելի դիմաց: Պատճառը ներդրողների այն մտահոգությունն է, որ Եգիպտոսում տեղի ունեցող իրադարձությունները կարող են տարածվել նաև նավթարդյունահանող Մերձավոր Արևելքի երկրների վրա:
Brent Crude Oil մարկայի ֆյուչերսների գինը Լոնդոնի IСE (InterContinental Exchange Futures) բորսայում երկուշաբթի աճեց 1.59 դոլարով` կազմելով 101.01 դոլար 1 բարելի դիմաց, որը հանդիսանում է ամենաբարձր գինը 2008 թ. սեպտեմբերից հետո:
Նյու Յորքի NYMEХ (New York Merchantile Exchange) բորսայում մարտ ամսվա ֆյուչերսների գինը Light Sweet Crude Oil մարկայի ամերիկյան թեթև նավթի համար բարձրացավ 2.85 դոլարով` մինչև 92.19 դոլար 1 բարելի դիմաց:
Իսկ երեքշաբթի միջազգային շուկաներում նավթի գները փոփոխվեցին տարբեր ուղություններով` պայմանավորված նաև ԱՄՆ հանքահումքային շաբաթական պաշարների վերաբերյալ գնահատականների սպասումներով:
Brent Crude Oil-ի մարտյան ֆյուչերսների գինը IСE բորսայում աճեց 0.73 դոլարով` հասնելով 101.74 դոլարի մեկ բարելի դիմաց, իսկ NYMEХ բորսայում Light Sweet Crude Oil մարկայի նավթի գինը իջավ 1.42 դոլարով` կազմելով 90.77 դոլար 1 բարելի դիմաց:
