Ղարաբաղ կոմիտեի անդամ Աշոտ Մանուչարյանը «Առաջին լրատվականի» հետ զրույցում անդրադարձավ Մերձավոր Արևելքում տեղի ունեցող հեղափոխական շարժումների և վարչակարգերի փոփոխությունների հնարավոր ազդեցությանը կովկասյան տարածաշրջանի վրա:
Ըստ Մանուչարյանի` սա մեծ ազդեցություն կարող է ունենալ Ադրբեջանի վրա, ավելի պակաս` Թուրքիայի և Իրանի, որովհետև այնտեղ ևս կան ինտենսիվ գործող հականյութապաշտական համակարգեր:
Մանուչարյանի խոսքերով, այդ ամենից անմասն չի մնալու նաև հետխորհրդային տարածքը, որտեղ ազդեցությունը լինելու է հսկայական.
«Պետք չէ ասել, թե մենք ուրիշ ենք, Մուբարաքը` ուրիշ: Իրոք ուրիշ ենք, բայց ոչ դրական իմաստով: Այսօրվա վիճակը պահպանելու պոտենցիալը գնալով ընկնում է, և ինչ սրընթացությամբ կարող է զարգանալ հակառակ պրոցեսը, դժվար է կանխագուշակել: Այդ անհեթեթ հայտարարությունները, թե հայերը սոցիալական բունտ չեն սիրում, նրանք թողնում մեկնում են, իսկ ո՞վ ասաց, որ դա միշտ է լինելու, ինչ աստիճանի էլ հասցնեն:
Հույսները դրա վրա է, այո՛, եթե հասցնի մեկնել, միգուցե կգնա երկրից, բայց հսկայական թվով մարդկանց համար շաքարի, հացի և այլ ապրանքների գները շատ ավելի սրընթաց են բարձրանում, և ինքն իր երեխային այլևս կերակրել չի կարողանում: Այդ մարդը գերանդին կվերցնի և դուրս կգա փողոց, և դա որ վայրկյանին կլինի, շատ դժվար է ասել»:
Մանուչարյանի գնահատմամբ, Հայաստանում այդ զարգացումներն ավելի վտանգավոր կարող են լինել, քան Եգիպտոսում, քանզի մենք ունենք արտաքին թշնամիներ: Ավելին, ըստ Մանուչարյանի` շատ հավանական է, որ Հայաստանում տիրող իրավիճակից օգտվեն նաև դրսի ուժերը, և հուզումները կազմակերպվեն հենց դրսից: