Կենդանաբանները վերջապես բռնել են Տոկիոյի ծոցում իր ազատությունը վայելող Հումբոլտ անունով պինգինին, որը հայտնի էր դարձել ողջ աշխահին՝ մարտին կենդանաբանական այգուց փախուստի դիմելով: Նա կարողացել էր հաղթահարել Ծովային պարկի 4 մետրանոց պատը և ազատության մեջ հայտնվել:
Ծագումով Հարավային Ամերիկայից, ազատատենչ պինգվինին երեկ՝ երկոյան, Էդոգավա գետի կամրջի տակ նկատել է Տոկիոյի բնակիչն ու նրա անվտանգությամբ անհանգստացած՝ զանգահարել պարկ: Ինչպես հաղորդում է Itar-Tass-ը, երկու աշխատակիցներ եկել են և մերկ ձեռքերով բռնել նրան:
Անասնաբույժներն ուսումնասիրել են թռչունին և հայտնել, որ ազատ կյանքը նրա առողջությանը վնաս չի հասցրել: Թռչունն առողջ է:
Այգու աշխատակիցները դեռևս չեն կարողանում բացատրել, թե ինչպես էր Հումբոլտին հաջողվել հաղթահարել արգելքներն ու դուրս գալ Տոկիոյի ծոց: Նրան մի քանի անգամ նկատել էին տեղի գետերում, սակայն այգու տնօրինությունը որոշում չէր կայացրել, բռնե՞լ ազատատենչին թե՞ ոչ: Տեղեկություններ կային, որ այգու ղեկավարությունը մտադիր է նրան հետևել և օգնություն ցուցաբերել միայն անհրաժեշտության դեպքում: Նա ակվապարկում բնակվում էր իր 135 հարազատների հետ:
Հումբոլտի ցեղատեսակի պինգվինները գտնվում են ոչնչացման եզրին: Թռչունների առքն ու վաճառքը արգելված է Բնության պաշտպանության վաշինգտոնյան կոնվենցիայով: