Ֆեյսբուք սոցիալական ցանցը առաջին տեղն է գրավել նախորդ տարի գործատուների կողմից առավել շատ արգելափակվող կայքերի շարքում (23%): Առաջին հնգյակում են հայտնվել նաև MySpace սոցիալական ցանցը (13%), YouTube տեսանյութերի պորտալը (11.9%), Ad.DoubleClick գովազդային հարթակը (5.7%) և միկրոբլոգների Twitter ծառայությունը (4.2%): Այս մասին, vesti.ru-ի փոխանցմամբ, ասվում է համացանցային անվտանգություն ապահովող OpenDNS-ի հաշվետվության մեջ:
Առհասարակ ամենաշատը արգելափակվող (ոչ միայն աշխատատեղում) կայքերի վարկանիշը նույնպես գլխավորել է Ֆեյսբուքը (14.2%): Երկրորդ տեղում է հայտնվել MySpace-ը (9.9%), երրորդում` YouTube-ը (8.1%): Չորրորդ և հինգերորդ տեղերը զբաղեցրել են համապատասխանաբար Doubleclick-ը (6.4%) և Twitter-ը (2.3%):
OpenDNS-ը կազմել է նաև այն կայքերի ցուցակը, որոնք 2010 թ. ամենաշատն են ենթարկվել այսպես կոչված ֆիշինգային հարձակումների: Առավել հաճախ դրանց թիրախում են հայտնվել PayPal վճարային համակարգը (45.9%), Ֆեյսբուքը (5.3%), HSBC Group բանկային խմբի կայքը (4.1%) և World of Warcraft բազմակի օգտատերերով խաղը (3.2%):
