Ինչպես արդեն հաղորդել էր «Առաջին լրատվականը», անցած ուրբաթ հայ իրավապահներին հաջողվել էր առգրավել աննախադեպ ծավալների թմրանյութ: Մասնավորապես, առգրավվել էր էքստազիի 42,000 հաբ և մոտ կես կիլոգրամ մաքուր հերոին:
Ոստիկանները նախ ձերբակալել էին մի ամերիկահայի` Զոհրաբ անունով, ում միջոցով պարզվել էր, որ ներկրված աննախադեպ չափի թմրանյութի հետևում կանգնած են բարձրաստիճան հայ պաշտոնյաներ: «Առաջին լրատվականին» հայտնի էր դարձել, որ Զոհրաբի անմիջական հովանավորը Տաշկենտսկի Սաշա մականունով քրեական հեղինակությունն է:
Երեկ իրավապահ մարմինները ստորագրությամբ բաց էին թողել Զոհրաբին: Սակայն այսօր Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը մեզ հետ զրույցում պնդեց, որ Զոհրաբին ազատության մեջ թողնելու որոշումը փոխվել է, և նա կրկին կալանքի տակ է:
«Առաջին լրատվականի» աղբյուրները, սակայն, պնդում են, որ Զոհրաբը շարունակում է մնալ ազատության մեջ:
Հիշեցնենք, որ չնայած նրան, որ Հայաստանում գրեթե անհնար է երկու թմրանյութերից էլ ձեռք բերել, երկուսն էլ համարվում են չափազանց վտանգավոր ու թանկ թմրանյութեր: Էքստազիի մեկ հաբը Հայաստանում մոտավորապես արժե 50 ԱՄՆ դոլար:
