2010 թվականի ՀՀ պետական բյուջեի եկամուտները կազմել են 755.8 մլրդ դրամ, իսկ ծախսերը` 856.8 մլրդ դրամ, որոնք համապատասխանաբար 100.6%-ով և 97.4%-ով ապահովել են տարեկան ծրագրային ցուցանիշների կատարումը: Այս մասին ասվում է Ֆինանսների նախարարության տարածած մամլո հաղորդագրությունում:
Նախորդ տարվա նույն ժամանակահատվածի համեմատ, պետական բյուջեի եկամուտներն աճել են 11.7%-ով կամ 79.4 մլրդ դրամով: Ընդ որում, 11.9%-ով (74.2 մլրդ դրամով) ավելացել են հարկային եկամուտները, պետական տուրքերը և պարտադիր սոցիալական ապահովության վճարները, 17%-ով կամ 7.3 մլրդ դրամով` այլ եկամուտները, միևնույն ժամանակ պաշտոնական դրամաշնորհները նվազել են 25.5%-ով կամ 2.1 մլրդ դրամով:
2010 թվականին, ինչպես արդեն նշվեց, ՀՀ պետական բյուջեի միջոցների հաշվին կատարվել են 856.8 մլրդ դրամի ծախսեր` կազմելով տարեկան ծրագրի 97.4%-ը: Մասնավորապես` 750.6 մլրդ դրամ են կազմել ընթացիկ ծախսերը, 106.2 մլրդ դրամ` ոչ ֆինանսական ակտիվների հետ գործառնությունները: Հաշվետու տարում 18.8 մլրդ դրամի ծախսեր են կատարվել պետական հիմնարկների արտաբյուջետային միջոցների հաշվին:
2009 թվականի համեմատ պետական բյուջեի ծախսերն ավելացել են 3.9%-ով կամ 32.1 մլրդ դրամով: Աճը հիմնականում պայմանավորված է դրամաշնորհների, պետական պարտքի սպասարկման և ընթացիկ նորոգման ու պահպանման ծախսերի ավելացմամբ, ինչպես նաև ոչ ֆինանսական ակտիվների օտարումից մուտքերի նվազմամբ:
