2010 թ. հունվար-դեկտեմբերին արձանագրվել է մեռելածնության 842 դեպք, 2009թ. հունվար-դեկտեմբերին արձանագրված 802 դեպքի համեմատ, իսկ մեռելածնության գործակիցը` 1000 ծնվածի (ողջ և մեռած) հաշվով կազմել է համապատասխանաբար`18.4 %, 2009 թ.-ի`17.7%-ի համեմատ:
2010 թ. հունվար-դեկտեմբերին արձանագրվել է մահացության 28,008 դեպք: 2009 թ. համեմատ, մահվան դեպքերն աճել են 1.6%-ով, իսկ մահացության ընդհանուր գործակիցը` 1000 բնակչի հաշվով աճել է 0.1 պրոմիլային կետով:
2010 թ. հունվար-դեկտեմբերին, ինչպես 2009 թ.-ին, ծնվածների թվաքանակը 1.6 անգամ գերազանցել է մահացության դեպքերը: Բնական հավելաճի գործակիցը 1000 բնակչի հաշվով 2010 թ. հունվար-դեկտեմբերին կազմել է 5.2%, ինչպես 2009 թ. հունվար-դեկտեմբերին:
2010 թ. հունվար-դեկտեմբերին, 2009 թ. նույն ժամանակաշրջանի համեմատ, մահացության պատճառական կառուցվածքում մահացության գրեթե բոլոր հիմնական պատճառները աճ են արձանագրել, մասնավորապես` արյան շրջանառության համակարգի հիվանդություններից (1.2%), դժբախտ պատահարներից, թունավորումներից և վնասվածքներից (5.6%), նորագոյացություններից (2.7%), մարսողական օրգանների հիվանդություններից (2.0%), վարակիչ ու մակաբուծային հիվանդություններից (14.7%) և այլ հիվանդություններից (1.9%):
Բացառություն են կազմում շնչառական օրգանների հիվանդություններից մահացության դեպքերը, որում արձանագրվել է նվազում`4.3%-ով:
2010 թ. հունվար-դեկտեմբերին, 2009թ. հունվար-դեկտեմբերի համեմատ, արձանագրվել է 0-1 տարեկան երեխաների մահվան դեպքերի 11.5% աճ (ինչը մասամբ պայմանավորված է նաև քաղաքացիական կացության ակտերի գրանցման համակարգում կատարված բարեփոխումներով), իսկ մանկական մահացության գործակիցը` 1000 ողջ ծնվածի հաշվով աճել է և կազմել 11.3%` 2009 թ. 10.4%-ի դիմաց:
Հաշվետու ժամանակաշրջանում արձանագրված 0-1 տարեկանների կառուցվածքում 65.8%-ը կազմել են շուրջծնական շրջանում առաջացած առանձին վիճակներից, բնածին անկանոնություններից և ձևախախտումային խանգարումներով պայմանավորված մահվան դեպքերը, 2009 թ. նույն ժամանակաշրջանում արձանագրված 67.8%-ի համեմատ:
2009 թ. հունվար-դեկտեմբերին հանրապետությունում արձանագրվել է 0-4 տարեկան երեխաների մահվան 604 դեպք, որի կառուցվածքում մինչև 1 տարեկան երեխաների մահացության դեպքերը կազմել են 83.8%: Մինչև 5 տարեկան երեխաների մահացության գործակիցը (1000 ողջ ծնվածի հաշվով) կազմել է 13.5%. տղա երեխաների շրջանում` 14.3%, իսկ աղջիկների` 12.5%:
Հղիության հետ կապված բարդություններից, ծննդյան և ետծննդյան ժամանակահատվածում 2010 թ. հունվար-դեկտեմբերին գրանցվել է մայրական մահացության 4 դեպք, որով պայմանավորված, մայրական մահացության գործակիցը կազմել է 8.9 (100000 ողջ ծնվածի հաշվով):
