ՀՀ նախագահի հովանու ներքո իրականացվող երիտասարդ գիտնականների համար նախատեսված բնակարանաշինությունը, որի մեկնարկը տրվել է 2008-ի օգոստոսին, այսօր էլ շարունակվում է, սակայն այսօր էլ շատ երիտասարդ գինտնականների համար մնում է անհաս երազանք: Ծրագրով նախատեսված է` երիտասարդ գիտնականներին ու դասախոսներին ինքնարժեքին մոտ գներով բնակարաններ տրամադրել: Սակայն հարցն այն է, թե որքանով է Սերժ Սարգսյանի հայտարարած բնակարանը մատչելի երիտասարդ գիտնականներին, որոնց աշխատավարձը 50 հազար դրամ է: Հնագիտության եւ ազգագրության ինստիտուտի երիտասարդների գիտական խորհրդի նախագահ Ռոման Հովսեփյանը այն կարծիքին է, որ թեեւ 40, իսկ շատ հաճախ անգամ 50 տոկոս բնակարանների սովորական գներից էժան են բնակարանները, բայց ինչ խոսք, երիտասարդ գիտնականներից ոչ բոլորին են հասու, ավելին` գրանցվում են նրանք, ովքեր գիտեն, որ կօգնեն ծնողները, հարազատները, ընկերները: Ըստ նրա` շատերը չեն դիմում`հնարավորություններից ելնելով: Բացի այդ, կան մարդիկ, որ սկզբում գրանցվել են, բայց երբ եկել է փաստաթղթերը ներկայացնելու ժամանակը, շատերը չեն լրացրել, իսկ մյուս մասն էլ առաջին վճարումը անելու ժամանակ/ 20 տոկոս/նահանջում են, որովհետեւ չեն կարողանում վճարել: Երիտասարդ գիտնական, ազգագրագետ Արսեն Հակոբյանը ներգարվված է ծրագրում, սակայն նշում է, որ իր 50 հազար դրամ աշխատավարձով, այն աշխատավարձով, որ երկիրը առաջարկում է իրեն՝ որպես երիտասարդ գիտնականի, հնարավոր չէ բնակարանը ձեռք բերել: «50 հազար դրամ աշխատավարձով միտք ստեղծելն արդեն իսկ նվիրում է, մարդը այդ դեպքում չի աշխատում դրամի համար: Դրական տեղաշարժ չի երեւում, անգամ հայագիտության բնագավառում, որն անընդհատ քարոզվում է, խոսվում է դրա մասին, սակայն կյանքի չի կոչվում: Ինչո՞ւ են իմ՝ որպես գիտնականի նախագծերը միշտ հետաքրքություն առաջացնում միայն օտարերկրյա գիտական ֆոնդերի համար»,- նշեց Արսեն Հակոբյանը:
