Ինչպես փոխանցում է The Spokesman Review-ն, Միացյալ Նահանգների պետքարտուղարությունը զգուշացրել է ամերիկացիներին Ադրբեջանում «արևմտյան թիրախների» նկատմամբ ահաբեկչական վտանգի մասին` կոչ անելով նրանց զգոն լինել այս երկրում գտնվելու ժամանակ:
Շաբաթ օրը Բաքվում ԱՄՆ դեսպանատան կողմից հրապարակված հաղորդագրության մեջ ասվում է, որ Ադրբեջանում կա ահաբեկչական հարձակման իրական վտանգ, այդ թվում` «ամերիկյան շահերի դեմ»: Հաղոդագրության մեջ նշվում է, որ «ԱՄՆ քաղաքացիներն այս երկրում պետք է զգոնություն ցուցաբերեն, հատկապես հասարական այն վայրերում, որտեղ կան «արևմտյան թիրախներ» (հավանաբար նկատի ունեն արևմտյան ընկերություններին և կազմակերպություններին պատկանող օբյեկտները – 1in.am)»:
Հաղորդագրությունում, սակայն, չի նշվում, թե խոսքն ինչ բնույթի թիրախների մասին է, և ովքեր են կանգնած դրա հետևում:
Հիշեցնենք, որ Ադրբեջանում արևմտյան կազմակերպությունները գործում են հիմնականում նավթագազային ոլորտում, և ահաբեկչության վտանգի մասին տեղեկությունները կարող են կապված լինել նրանց պատկանող կառույցների հետ: