Վերջերս Վրաստանում ակտիվորեն աշխատանքներ են տարվում հյուրանոցային օբյեկտների , ինչպես նաև հասարակական սննդի կենտրոնների կողմից մատուցված ծառայությունների գնահատման ուղղությամբ:
Այդ նպատակով «Global Star» ընկերությունը հետազոտություններ է կատարում և համապատասխան «աստղեր» վերագրում ընկերություններին:
Ի սկզբանե նախատեսված էր «աստղեր» վերագրել հյուրանոցներին, բայց ընկերությունը որոշեց ընդլայնել իր գործունեությունը մինչև հյուրանոցային տիպի տներ, ինչպես նաև սննդի կենտրոններ:
Այս նույն բանը արվում է նաև Սոչիում, սակայն ի տարբերություն Վրաստանի, այստեղ հյուրանոցների ու հյուրանոցային տիպի օբյեկտների որակավորումը պարտադիր է: Այն օբյեկտները, որոնք որակավորումը չեն անցնի, կզրկվեն ծառայություններ մատուցելու իրավունքից: Սա կապված է Սոչիում Օլիմպիական խաղերի անցկացման հետ:
Օրենսդրության համաձայն` մինչև 2011 թ. հուլիսը բոլոր հյուրանոցային համալիրները պետք է անցնեն պարտադիր որակավորում: Ինչպես հաղորդում է «Деловая газета» –ն, ատեստացիան անցնելու հիմնական խոչընդոտը շուկայի մասնակիցների համար ատեստավորման վճարն է: Առայժմ «3 աստղ» ստանալն արժե մոտավորապես 60 հազ. ռուբլի, սակայն այդ գինը խոստացվել է իջեցնել մինչև 20-ից 25 հազարի: Բացի այդ, որակավորումն ստանալու համար անհրաժեշտ է հավաքել համապատասխան միավորներ:
Մինի- հյուրանոցների շատ տերեր այնքան էլ գոհ չեն որակավորման անհրաժեշտությունից: Քաղաքում աշխատում են չկազմակերպված հանգստի ոլորտի մոտավոր 5 հազ. հյուրանոցային տներ: Հիմա նրանք հանդես են գալիս որպես անհատ ձեռնարկատերեր:
Սակայն հավաստագրման անհրաժեշտությունը պահանջում է, որ նրանք դառնան իրավաբանական անձ, որն էլ ենթադրում է ավելի շատ հարկեր: Բացի այդ պարտադիր որակավորման ժամկետներով բավարարված չեն մեծ հյուրանոցային համալիրների մենեջերները:
Նրանք նշում են, որ ժամանակահատվածը սխալ է ընտրված, քանի որ հանգստի օբյեկտները այժմ գումարներ են խնայում իրենց բարելավելու համար:
Պլանավորվում է, որ «աստղային » հավաստագիրը տրվելու է 5 տարով, սակայն ընկերությունները ամեն տարի պետք է անցնեն փորձագիտական վերահսկողություն: Իսկ հավաստագիր չունեցող ընկերությունների գործունեությունը կարգելվի մինչև 2016թ-ի վերջը: Գործելու դեպքում նրանք կտուգանվեն:
Այս պահին Սոչիում որակավորում ունեն 132 հյուրանոցային օբյեկտներ, ընդ որում քաղաքում հյուրանոցային օբյեկտների ընդհանուր քանակը գերազանցում է 800-ը:
