Թուրքիայի նախագահ Աբդուլահ Գյուլը հանձնարարել է Պետական վերահսկողական խորհրդին հետաքննել Հրանտ Դինքի սպանության գործը: Այս մասին տեղեկացնում է թուրքական NTV-ն:
Դեռ Ստրասբուրգում Գյուլը հայտնել էր լրագրողներին, որ կհանձնարարի պարզել սպանության մանրամասները: Գյուլը նաև ասել է, որ թուրքական կառավարությունը ամաչում է, որ չի պաշտպանել իր քաղաքացիներից մեկի կյանքը, և որ այժմ էլ նրանք խիստ անհանգստացած են, որ Դինքի սպանության մանրամասները դեռ չեն բացահայտվել:
Գյուլի խոսքով, Դինքի սպանությունը չբացահայտված թողնելը բիծ կդառնա Թուրքիայի պատմության մեջ և կասկածի տակ կդնի թուրքական դատական համակարգի գործունեությունը:
Նախագահի այս որոշման մասին ընդդիմադիր Ժողովրդահանրապետական կուսակցության առաջնորդ Քեմալ Քիլիդարօղլուն ասել է, որ հետաքննությունն իրոք կբացահայտի ճշմարտությունը:
«Մենք գիտենք, որ իշխող «Արդարություն և զարգացում» կուսակցությունն է թաքցնում ճշմարտությունը: Փաստերը թաքցնում են հենց նրանք` բարձր պաշտոնյաները»,- ասել է Քիլիդարօղլուն:
Դինքի սպանության հետաքննությունը կանցի երկու փուլով, կուսումնասիրվեն գործին առնչվող նոր փաստաթղթեր ու նոր փաստեր:
