The Los Angeles Times թերթը գրել է վերջին օրերի եգիպտական հանրահավաքների մասին: Թերթը փաստում է, որ սկսած 1970-ական թվականներից` առաջին անգամ է, որ այսքան մարդ է ներգրավված այդ գործընթացներում:
Թերթը նշում է, որ այս ելույթների համար կա 5 սովորական պատճառ:
Առաջինը ժամանակային է, երբ ոգեշնչումը գալիս է Թունիսի «հասմիկների» հեղափոխությունից: Պահը արաբական երկրների քաղաքացիներին թույլ է տվել, օգտագործելով Թունիսում հաջողությամբ պսակված հեղափոխությունը, հասնել իրենց երկրներում որակական փոփոխությունների:
Երկրորդը` Եգիպտոսի ներքին սոցիալական իրավիճակով էր պայմանավորված: Չկան պաստառներ` «Մահ Ամերիկային և Իսրայելին, ինչպես նաև իմպերիալիզմին» կամ «Միասին ազատագրենք Պաղեստինն ու Իրաքը»:
Կահիրեի, Ալեքսանդրիայի և Սուեզի փողոցներում մարդիկ ուզում են փոփոխություն, ազատություն, սոցիալական արդարություն և կոռուպցիայի դեմ պայքար, ինչն էլ բարձրաձայնում են: Եգիպտացիներն իրենց համար հայտնաբերեցին, որ քաղաքականությունը, ամեն ինչից զատ, կապված է նաև քաղաքացու կենսական նշանակություն ունեցող խնդիրների հետ:
Երրորդը` գաղափարախոսության լիակատար բացակայությունն է, ինչը տարիներ շարունակ գերիշխում է Եգիպտոսի քաղաքական և հասարակական կյանքում: Թեպետ «Մուսուլման եղբայրներ» կազմակերպության որոշ երիտասարդներ և քաղաքական գործիչներ մասնակցում են այս միջոցառումներին, սակայն նրանք այլևս չեն բացականչում «Միակ լուծումն Իսլամն է»: Մասնակցում էին նաև ձախակողմյան որոշ կազմակերպությունների ներկայացուցիչներ, սակայն չկան նրանց ավանդական` կորչի գլոբալ իմպերիալիզմը, գաղութատիրությունը և սիոնիզմը կարգախոսները: Եվ դրա պատճառը այն նախանշաններն էին, որ կան մի քանի տարի շարունակ` գաղափարախոսությունները դժվարացնում են մարդկանց մոբիլիզացիան: Այդ պատճառով է, որ տարիներ շարունակ շատ կուսակցություններ տապալվել են քաղաքացիների մեծ զանգվածների աջակցությունը ձեռք բերելու հարցում: Բացի այդ, թերթը նշում է այն կարևոր դերը, որ խաղացին երիտասարդական կազմակերպություններն ու շարժումները, որոնք այս ամենը կազմակերպեցին սոցիալական ցանցերի միջոցով:
Չորրորդը` երիտասարդների անհավանական թիվն է բողոքի ակցիաների ժամանակ: Եգիպտացիները սովորել են փողոցում բողոքների ժամանակ տեսնել նույն քաղաքական գործիչների դեմքերը: Հիմա դա փոխվել է: Երիտասարդներն են և նրանց կազմակերպություններն ու շարժումները, որոնք յուրատեսակ կամուրջ դարձան երիտասարդության և հասարակության ակտիվ քաղաքացիների միջև: Անկախ նրանից, թե ինչ է լինելու առաջիկա օրերին, սա ողջունելի է և բերելու է դինամիկ զարգացման:
Հինգերորդը` հացի խնդիրը համատեղվել էր քաղաքական բարեփոխումների և կոռուպցիայի դեմ պայքարի պահանջների հետ: Քաղաքական թատերաբեմում սոցիալ-տնտեսական և քաղաքական խնդիրների շաղկապումը շատ երկար ժամանակ բացակայում էր: Սրանց փոխկապակցումը իշխանություններին կզրկի սոցիալ-տնտեսական որոշ բարեփոխումներն իրականացնել քաղաքականի հաշվին: Թերթը կանխատեսում է, որ այս միախառնումը ապագայում էլ կշարունակվի և արդյունք կտա:
Այս հինգ փաստերն արձանագրում են, որ վախի մթնոլորտը Եգիպտոսում կոտրված է: Սա թույլ է տվել ներգրավվել մեծ զանգվածների, որոնք հետամուտ են լինելու խնդիրների լուծմանը, իսկ իշխանություններին թույլ չեն տալու որոշ խնդիրների լուծման հաշվին, մյուսների դեպքում բռնարարքներ իրականացնել:
Եգիպտոսի հասարակությունը տառապում է անասելի վատ կենսապայմաններից, հարուստների և աղքատների միջև հսկայական տարբերությունից, մուսուլմանների և ղպտիների միջև լարվածությունից, ինչպես նաև անցած աշնանը ձևավորված խորհրդարանի լեգիտիմության բացակայությունից: Այս ճգնաժամը Եգիպտոսին թույլ կտա խուսափել ապագա քաոսից և հետամուտ լինել, որպեսզի սկսվեն իրական բարեփոխումներ: