2010 թ. դեկտեմբերի վերջին շաբաթվա և 2011 թ. հունվարի առաջին երկու շաթաթների ընթացքում ԿԲ-ն բավականին մեծ ծավալի` շուրջ 48 մլն դոլարի արտարժութային ներարկումներ արեց` թույլ չտալու համար դրամի արժեզրկում: Արդյոք սա չի՞ նշանակում, որ ԿԲ-ն իրականում այդպես էլ չի իրականացնում լողացող կուրսի քաղաքականություն:
«Առաջին լրատվական»-ի հետ զրույցում, պատասխանելով այս հարցին, ԱԺ տնտեսական հարցերի հանձնաժողովի փոխնախագահ Վարդան Բոստանջյանը նշեց, որ ԿԲ-ն ներարկումներ անում է` գների կայունության ապահովման իր հիմնական խնդիրը լուծելու անհրաժեշտությունից դրդված:
«Գների կայունության ապահովման պարտավորությունը դրված է ԿԲ վրա: ԿԲ-ն, ըստ էության, այս խնդիրը լուծելու համար աշխատում է իր տիրապետման տակ գտնվող գործիքակազմով, որը, իմ կարծիքով, բավարար չէ գների կայունության ապահովման համար»,- նշեց Վ. Բոստանջյանը` շեշտելով, որ դրամի կուրսը կայուն պահելով` ԿԲ-ն փորձում է թույլ չտալ գների բարձրացում, ինչը տեղի կունենար դրամի արժեզրկման պարագայում:
«Սա է պատճառը, որ ԿԲ-ն հաճախակի ինտերվենցիաներ է կատարում»,- ասաց Վ. Բոստանջյանը:
Լուսանկարը` PanArmenianPhoto-ի
