«Առաջին Լրատվականի» այն հարցին, թե հնում Հայաստանում հաղթանակներն ինչպես էին ամրագրվում արձանների տեսքով, հնագետ Արսեն Բոբոխյանն ասաց, որ Հին Հայաստանում ամենառազմականացված հասարակությունը եղել է երկաթի դարում, և պեղումների ժամանակ դամբարաններից զինվորների արձաններ գտել են. «Պեղումների ժամանակ դամբարաններից շատ դեպքերում հանվում են զինվորների արձաններ` իրենց զենքերով, իրենց առանձնահատկություններով: Այսօր մենք հաղթանակի հետ կապված կոնկրետ արձաններ չունենք, որ դարեր անց պեղումների ժամանակ հնագետները գտնեն, այ ֆիդայինների, անհատների` որքան ուզեք: Հին ժամանակներում չեն եղել այնպիսի արձաններ, որ իմանանք, թե ում հետ գործ ունենք, բայց ռազմական գործիչներին միշտ էլ մեծարել են»:
Հնագետ Սիմոն Հմայակյանը մեզ հետ զրույցում նշեց` ճակատամարտերի ժամանակ հաղթանակի արձաններ կային, որոնց վրա նշվում էր այս կամ այն թագավորի հաղթանակը. «Ուրարտացիները ռազմական, մշակութային և ընդհանրապես բոլոր իրադարձությունների հետ կապված արձաններ էին դնում: Ուրարտացիները ունեին նաև մեծ կոթողային արձաններ, որոնց վրա գրում էին, թե տարվա ընթացքում ինչ է եղել: Ճակատամարտի ժամանակ հաղթանակի արձանների` ստելլաների վրա նշում էին, թե այս կամ այն թագավորը գրավեց այս կամ այն երկիրը Խալդի համար, կամ այս կամ այն երկիրը պարտություն կրեց»:
