Կոլումբիայի շրջանային Վերաքննիչ դատարանը աջակցություն է հայտնել Ազգային անվտանգության գործակալության որոշմանը` չհրապարակելու փաստաթղթերը, որոնք հաստատում կամ հերքում են գերատեսչության կապը Google կորպորացիայի հետ:
Դատարանի որոշումը պայմանավորված է Էլեկտրոնային անձնական տվյալների պաշտպանության կենտրոնի պահանջով: Կենտրոնը պահանջել էր բացահայտել, թե ինչպիսի փոխհարաբերություն ունեն կորպորացիան և հետախուզական ծառայությունը:
Կազմակերպությանը մասնավորապես հետաքրքրում էր 2010-ի հունվարին Gmail փոստային ծառայությունում չինացի հասարակական ակտիվիստների account-ների զանգվածային կոտրումը: Այդ ժամանակ ինտերնետ-հսկան հայտարարել էր, որ օգնության համար դիմել է ամերիկյան իշխանություններին, հավանաբար` նաև Անվտանգության գործակալությանը:
Ավելի ուշ գործակալության ղեկավար Մայք Մաքքոնելը հայտարարել էր, որ հետախուզական ծառայության և մասնավոր ընկերությունների միջև փոխհարաբերություններն անխուսափելի են: Սակայն գերատեսչությունը ո՛չ հաստատել, ոչ էլ հերքել է կորպորացիայի հետ կապի մասին հաղորդագրությունը:
Իր որոշման մեջ դատարանը ցույց է տվել, որ հետախուզական գործակալության և կորպորացիայի փոխհարաբերությունների մասին փաստաթղթերի հրապարակումը կարող է վնաս հասցնել ԱՄՆ-ի ազգային անվտանգությանը:
