Թուրքական Cumhuriyet թերթի փոխանցմամբ՝ Թուրքիայի Ազգային մեծ ժողովի (ԹԱՄԺ) Հեղաշրջման հանձնաժողովում ստեղծվել են երեք ենթահանձնաժողովներ, որոնք հետազոտելու են Թուրքիայի Հանրապետությունում (ԹՀ) իրականացված հեղաշրջումները:
Դրանցից առաջինը հետազոտելու է 1960 թվականի մայիսի 27-ին և 1971 թվականի մարտի 12-ին (հուշագիր) իրականացված զինվորական հեղաշրջումները, երկրորդը՝ 1980 թվականի սեպտեմբերի 12-ին ԹՀ պատմության ընթացքում իրականացված ամենաարյունալի զինվորական հեղաշրջումը, իսկ երրորդը՝ 1997 թվականի փետրվարի 28-ի հետմոդեռնիստական (թավշյա) հեղաշրջումը:
Ուշագրավն այն է, որ թուրքական գլխավոր ընդդիմադիր Ժողովրդա-հանրապետական կուսակցությունը (ԺՀԿ) ներկայացնող և Աֆյոնքարահիսարից ընտրված պատգամավոր Ահմեդ Թոփթաշն առաջարկել էր ստեղծել նաև 4-րդ ենթահանձնաժողովը, որն իր հերթին պետք է հետազոտեր 2007 թվականի ապրիլի 27-ին (Աբդուլլահ Գյուլի նախագահ ընտրվելու ժամանակ) Գլխավոր շտաբի տարածած հուշագիրը: Նա 2007 թվականի ապրիլի 27-ի հուշագիրը նմանեցրել էր 1997 թվականի փետրվարի 28-ին զինվորականների ներկայացրած 20 պահանջների հետ:
Սակայն իշխող «Արդարություն ու զարգացում» կուսակցությունը (ԱԶԿ) մերժել է ԺՀԿ-ի ներկայացրած այդ առաջարկը՝ նշելով, որ ապրիլի 27-ը հեղաշրջում չէ, ինչի համար էլ կարիք չկա հետազոտել այն: Դա կասկածների տեղիք է տվել ընդդիմության մոտ և ընդդիմադիր մամուլն ընդգծում է, որ ապրիլի 27-ն ԱԶԿ-ի վահանն է:
ԹԱՄԺ-ի Հեղաշրջման հանձնաժողովի նիստը գումարվելու է երեքշաբթի, ուր և կազմվելու է հետագա անելիքների «ճանապարհային քարտեզը»:
Հիշեցնենք, որ 2007 թվականի ապրիլի 27-ին՝ տեղական ժամանակով ժամը 23.20-ին, գլխավոր շտաբը հրապարակեց մի հուշագիր, որում հաստատվում էր Թուրքիայի Հանրապետության աշխարհիկ ռեժիմի անխախտությունը:
Այդ հուշագիրը նախագահական ընտրությունների ժամանակ ստորագրել է տվյալ ժամանակվա գլխավոր շտաբի պետ Յաշար Բույուքանըթը: Այն ժամանակ բանակը հանդես էր գալիս Աբդուլլահ Գյուլի թեկնածության դեմ: Հուշագրի տեքստը հայտնվել էր ինտերնետում, որից հետո շատ լրագրողներ ու վերլուծաբաններ այն անվանեցին «E-հուշագիր» (էլեկտրոնային հուշագիր):
Հուշագրում ասվում էր, որ Թուրքիայի Հանրապետության նախագահ ու զինված ուժերի գերագույն հրամանատար կարող է լինել այնպիսի մարդ, որը հավատարիմ կգտնվի երկրի աշխարհիկ բնույթին, Աթաթուրքի իդեալներին ու ազգային մտածելակերպին: Էրդողանն այդ հուշագիրը համեմատել էր երկրաշարժի հետ: