«Սասուն» ջոկատի լավագույն ազատամարտիկներից Գագիկ Մաթևոսյանը պատերազմի թեժ պահին նոր անուն է ստանում` Թագավոր։ Սակայն պատճառը ամենևին էլ իր մարտական անցյալը չի եղել։ Ինչպես մեզ հետ զրույցում հիշեցին նրա մարտական ընկերները, կռվի թեժ պահին, երբ թշնամին հարձակման է անցնում, մարտական ընկերները նկատում են, որ Գագիկ Մաթևոսյանը մի ծառի տակ քնած է։ Տղաները այս թեժ պահին շտապ նրան արթնացնում են և զգուշացնում, որ թշնամին հարձակվում է։ Սակայն նա, տղաներին շնորհակալություն հայտնելու փոխարեն, որ իր կյանքն են փրկել, արթնանում է և դժգոհում, թե ինչու չթողեցին՝ երազը ավարտվեր։ Երբ տղաները հետաքրքրվում են, թե ինչ երազ էր տեսնում, որ կյանքից թանկ էր, պատասխանում է, թե երազում իրեն թագավոր էին կարգել։ Այդ օրվանից հետո մարտական ընկերները Գագիկ Մթևոսյանին սկսում են միայն Թագավոր անունով դիմել։