Ջակարտայում ցուցադրական թռիչքի ժամանակ ռադարներից անհետացած ռուսական արտադրության Sukhoi SuperJet-100-ի գրեթե բոլոր ուղևորները եղել են ինդոնեզացիներ, որոնց թվում` տրանսպորտային ընկերության 30 աշխատակից և 5 լրագրող: Այդ մասին հայտնում է Detik.com ինտերնետ-պորտալը:
Ինչպես ավելի վաղ հայտնել էր Ինդոնեզիայի օդային հսկողության ավիացիոն ծառայության ներկայացուցիչը , ռուսական ինքնաթիռը կորել է ինդոնեզական Բոգոր շրջանում` Ջակարտայից մոտավորապես 100-120 կմ հեռավորության վրա: Ինքնաթիռի որոնման աշխատանքները դժվարացնում է մթությունն ու սկսված անձրևը:
Հատնի է, որ ինքնաթիռում եղել է 44 մարդ` 8 հոգուց (ռուսներից) բաղկացած անձնակազմ ու 36 ուղևոր:
Ինտերնետ պորտալի հաղորդմամբ` ամենայն հավանականությամբ, ինքնաթիռի ուղևորները Ինդոնեզիայի քաղաքացիներ են:
«Նրանցից շուրջ 30-ը ինդոնեզական ու մարզային տրանսպորտային ընկերությունների աշխատակիցներ են , 5-ը՝ լրագրողներ ու հեռուստաընկերության աշխատակիցներ»,- հայտնում է ինտերնետ-պորտալը:
Ինչպես հայտնում է Detik.com լրատվական պորտալը , լրագրողներից 2-ի հեռախոսներն աշխատում են, սակայն չեն պատասխանում:
Sukhoi Superjet 100-ը Ինդոնեզիայում էր ասիական երկրներ այցի շրջանակում: Ընդհանուր առմամբ` նախատեսված էր այցելել 6 երկիր` Ղազախստան, Պակիստան, Մյանմա, Ինդոնեզիա, Լաոս ու Վիետնամ: Ընդհանուր առմամբ` նախատեսվում էր հաղթահարել 15510 կմ:
SSJ-100-ը Ջակարտա էր ժամանել 2012թ. մայիսի 9-ին ու արդեն հասցրել էր իրականացնել 2 թռիչք (ինքնաթիռն անհետացել է 3-րդ թռիչքի ժամանակ):
