Այս տարի կներկրվեն 475 գլուխ շվից, հոլշտին ու սիմենթալ ցեղերի տոհմային երինջներ, որոնք, ինչպես նաև դրանցից ստացված սերունդը, կօգտագործվեն հանրապետությունում տավարաբուծության զարգացմանն ուղղված տոհմասելեկցիոն աշխատանքներում: Այդ նպատակով վաղը կառավարությունը գյուղատնտեսության նախարարությանը առաջին կիսամյակի համար նախատեսում է հատկացնել 615 մլն 896.9 հազար դրամ:
Տավարաբուծության զարգացման ծրագրի շրջանակներում 2007-2011 թթ. ներկրվել և տարաժամկետ վճարման պայմանով ֆերմերներին հատկացվել է 1,332 գլուխ տոհմային երինջ: Ընդ որում, 2010 թ. տոհմային երինջները ձեռք են բերվել Ճապոնիայի կառավարության պաշտոնական օգնության շրջանակներում իրականացվող «Պարենային արտադրության աճ» 2 KR ծրագրի միջոցներով:
Այս տարի երինջները ձեռք կբերվեն «Ճապոնիայի կառավարության կողմից իրականացվող «Դրամաշնորհային աջակցություն սակավապահով ֆերմերներին» ծրագրի շրջանակներում «Տնտեսական կառուցվածքային բարեփոխումներին աջակցություն» դրամաշնորհային ծրագրի գործընկերային հիմնադրամի ֆինանսական միջոցներով:
