Ազատամարտիկ, լրագրող Սուրեն Սարգսյանը, «Առաջին լրատվական»-ի խնդրանքով անդրադառնալով Բանակի տոնին, նշեց. «Բանակը դարեր շարունակ եղել է մեր պապերի երազանքը: Վերջապես կարողացանք Առաջին հանրապետության կորստից հետո վերականգնել մեր բանակը, որը, որպես կառույց, կայացավ Ադրբեջանի դեմ տարած հաղթանակից հետո: Ավաղ, այսօր մեր բանակում տեղի են ունենում այնպիսի երևույթներ, որոնք ամոթալի են մեր երկրի համար: Բանակի նկատմամբ վերաբերմունքը ձևավորվում է դպրոցից: Իշխանություններն իրենց փչացած բարոյականությունն են պարտադրում բանակին: Բանակում, ցավոք, կան գեներալներ, որոնք նվաստացնում են հայ զինվորի արժանապատվությունը: Բանակը մարտի 1-ին հանեցին ժողովրդի դեմ: Եվ այդ մարդիկ իրենց արժանի պատիժը ստանալու փոխարեն ստանում են պաշտոններ: Եվ պետք է ամեն ինչ անենք այդ կոռումպացված հրամկազմից ազատվելու համար»:
