Ժողովրդին հեշտ է մատնացույց անելը, քանի որ ժողովուրդն անպաշտպան է, «Առաջին լրատվական»-ի հետ զրույցում նման տեսակետ հայտնեց քաղաքագետ Նվարդ Մանասյանը` խոսելով ընտրակաշառք երևույթի մասին:
Ըստ նրա` մարդն, ով 5 հազար դրամ ընտրակաշառք է վերցնում, շատ լավ հասկանում է, որ երկու օրում կօգտագործի այդ գումարը: «Սա խոսում է նրա մասին, որ այն աստիճանի աղքատություն ունենք, որ զարմանալի երևույթ չէ ընտրակաշառք վերցնելը: Երբ մարդը աղքատության և հացի խնդիր ունի, այդ մարդուն կարող են մանիպուլացնել, քանի որ աղքատություն և անելանելիություն է երկրում ստեղծված՝ իշխանության կողմից»,- մեկնաբանեց Նվարդ Մանասյանը` հավելելով, որ ժողովրդին հեշտ է մատնացույց անելը, քանի որ ժողովուրդն անպաշտպան է, մատնացույց է պետք անել համապատասխան մարդկանց, ովքեր չեն հասկանում, թե ինչ ասել է «պետական կառավարում»:
Անդրադառնալով գիտակցաբար անվավեր դարձրած քվեաթերթիկներին` Մանասյանն ասաց, որ դա ինչ–որ բանի մասին խոսում է: Ըստ նրա` սա խոսում է այն մասին, որ անելանելիություն կա հասարակության մեջ, կան մարդիկ, ովքեր ոչ մի դեպքում իրենց ձայնը չեն վաճառի: «Անելանելիությունից գալիս և իր բացասական ընտրությունն է կատարում»։
