Սաուդյան Արաբիայի և ԱՄՆ հատուկ ծառայությունները ներդրված գործակալի օգնությամբ կարողացել են կանխել խոշոր ահաբեկչություն։ Ինչպես տեղեկացնում է The New York Times-ը, ամերիկյան և սաուդական հատուկ ծառայությունները կարողացել են իրենց գործակալի միջոցով կապ հաստատել «Ալ-Քաիդա»-ի` Արաբական թերակղզու մասնաճյուղի հետ։ Գործակալը վստահություն ձեռք բերելուց հետո իր «ծառայություններն է» առաջարկել ահաբեկիչներին։ Նրան է վստահվել Եմենից ԱՄՆ ուղևորվող ինքնաթիռի պայթեցումը, սակայն նոր տեսակի պայթուցիկ սարքը ստանալուց հետո գործակալն այն փոխանցել է հատուկ ծառայություններին։
Կենտրոնական հետախուզական վարչությունում նաև նշել են, որ շնորհիվ ստացված այլ տեղեկությունների իրենց հաջողվել է կետային հարված հասցնել Եմենում «Ալ-Քաիդա»-ի մասնաճյուղի ղեկավարության թաքստոցին, ինչի արդյունքում սպանվել է այդ մասնաճյուղի ղեկավարներից մեկը։
