Արմատական ձախ ուժերի կոալիցիայի (ՍԻՌԻԶԱ) ղեկավար Ալեքսիս Տսիրպրասն այսօր Հունաստանի նախագահ Կարոլոս Պապուլյասից երեք օր ժամանակ է ստացել կոալիցիոն կառավարություն ձևավորելու վերաբերյալ բանակցություններ վարելու համար: Այս մասին հայտնում է ITAR-TASS գործակալությունը:
ՍԻՌԻԶԱ-ին նախարարների կաբինետի ձևավորման իրավունքն անցավ այն ժամանակ, երբ այն մայիսի 6-ին կայացած արտահերթ խորհրդարանական ընտրությունների արդյունքում զբաղեցրեց 2-րդ տեղը (52 տեղ միապալատ 300 տեղանոց խորհրդարանում):
Տսիրպրասը մտադիր է փորձել ստեղծել կոալիցիոն կառավարություն այն ձախ ուժերից, որոնք մերժում են Եվրամիության ու ԱՄՀ-ի հետ համաձայնագիրը:
Առաջին տեղն ընտրություններում զբաղեցրել էր աջ կենտրոնամետ «Նոր դեմոկրատիան» (ձայների 18.85 տոկոսը և 108 տեղ խորհրդարանում, ներառյալ 50 տեղ` որպես «բոնուս»):
Սակայն Անտոնիս Սամարիսը` «Նոր դեմոկրատիայի» առաջնորդը, չէր կարողացել երկուշաբթի ձևավորել կոալիցիոն կառավարություն:
Շտաբի տվյալների համաձայն` Տսիրպրասն այսօր կբանակցի ձախ Դեմոկրատականների նախագահ Ֆոտիս Կուվելիսի հետ, կանաչների պատվիրակության ու Սոցիալական համաձայնության առաջնորդ Լուկա Կացելի հետ:
Տսիրպրասը ևս մեկ անգամ համագործակցության կոչ կանի Հունաստանի ձախ ուժերին և կոմկուսին, որը մինչ այժմ հրաժարվում էր մտնել ցանկացած կառավարության կազմի մեջ:
ՍԻՌԻԶԱ-ի ղեկավարը մտադիր է օգտագործել այս երեք օրերը, որոնք Սահմանադրությամբ են տրված կոալիցիոն կառավարության ձևավորման համար:
