Իրանական Mehr News լրատվական գործակալության փոխանցմամբ՝ Իրանը կտրուկ է արձագանքում հարևան երկրներում «Իրանի Ժողովրդական մոջահեդների» (ԻԺՄ) ահաբեկչական խմբավորման անդամների տեղակայմանը: Այս մասին հայտարարել է Իրանի ԱԳՆ-ի պաշտոնական ներկայացուցիչ Ռամին Մեհմանպարաստը.
«Հարևան երկրները պետք է հաշվի առնեն այդ հանգամանքը: Նրանք պետք է այնպիսի գործունեություն ծավալեն, որ չվատթարացնեն Իրանի հետ իրենց հարաբերությունները: ԻԺՄ-ի ահաբեկիչներին տեղակայելու վերաբերյալ ամերիկա-իսրայելական պլանը կարող է նրանց համար ունենալ բացասական հետևանքներ: Այդ խմբավորումն ունի Իրանի և իրանական ժողովրդի դեմ կատարած հանցագործությունների երկար ցուցակ»:
Հիշեցնենք, որ մեկ ամիս առաջ ամերիկյան The New Yorker ամսագիրը գրել էր, որ ԻԺՄ-ի զինյալները մարտական պատրաստվածություն են անցել ԱՄՆ-ի Նևադա նահանգում՝ վկայակոչելով ամերիկյան հետախուզության նախկին բարձրաստիճան պաշտոնյային:
Վերջինիս հաղորդմամբ՝ ԻԺՄ-ի զինյալների ուսուցումը Նևադա նահանգում սկսվել է 2005 թվականին և ավարտվել է այն բանից հետո, ինչ ԱՄՆ նախագահ է դարձել Բարաք Օբաման: Ուսուցումն իրականացվել է այնպիսի տարածքում, ուր ներթափանցելու համար խիստ սահմանափակումներ են մտցված:
Այդ տարածքը կցված է եղել էներգետիկայի նախարարությանը, սակայն նախկինում ծառայել է միջուկային փորձարկումների համար: Իրանցի զինյալներին այդ տարածքում սովորեցրել են ծածկագիտություն, ոչ մեծ ստորաբաժանումների գործողությունների մարտավարություն, կապի միջոցներից օգտվելու ու զենքի հետ վարվելու հմտություններ: Առանձին խմբերի ուսուցումը տևել է կես տարի:
1979 թվականին ԻԺՄ-ն աջակցել է Իսլամական հեղափոխությանը, սակայն շուտով հակամարտության մեջ է մտել նոր իշխանությունների հետ: Ներկայիս դրությամբ ԻԺՄ-ն որպես ահաբեկչական կազմակերպություն է հռչակված թե՛ ԱՄՆ-ում, թե՛ Իրանում: ԵՄ-ն այդ քայլին է գնացել 2009 թվականին:
