«Քաղաքական քարոզարշավի ժամանակ, երբ մարդիկ քաղաքականացված են, ավելի քիչ են ուշադրություն դարձնում սեռական կյանքին: Այդ ժամանակ մարդկանց ուղեղը զբաղված է այլ ինֆորմացիայով, և այդ ոլորտը դառնում է երրորդային»,- այսօր լրագրողների հետ հանդիպմանն ասաց «Սեքսուալ առողջություն» ՀԿ տնօրեն, սեքսապաթոլոգ Ռուզաննա Ազատյանը:
Ըստ նրա՝ դա կարող է ունենալ լուրջ խախտումներ. «Նևրոզ, դեպրեսիա, ներքին անհանգստություն ու ագրեսիա: Տղամարդկանց մոտ կարող է լինել սերմնահեղուկի ժայթքում, էրեկցիայի խախտում, իսկ կանանց մոտ` ցանկության նվազում: Այսօր մարդիկ այլևս չեն ամաչում բժշկին դիմել. եթե լինում է խնդիր, անպայման դիմում են: Ավելի հաճախ տղամարդիկ են դիմում բժշկի, քան կանայք: Դիմում են 18-ից մինչև 78 տարեկան մարդիկ»:
Խոսելով սեռական դաստիարակության մասին` նա նշեց, որ այն պետք է սկսել երեխայի ծնված օրվանից. «Դա պետք է լինի դաստիարակության ընթացք: Հաճախ պետք է ծնողներին կրթել, որպեսզի նրանք կարողանան հետագայում կրթել իրենց երեխաներին»:
Ամփոփելով` սեքսապաթոլոգը խորհուրդ տվեց գնահատել որակյալ կյանքը, չանտեսել խնդիրները և անհրաժեշտության դեպքում անպայման դիմել բժշկի:
