Ադրբեջանն ու Թուրքմենստանը շահավետ դիրքում են. Յոշկա Ֆիշեր

«Եվրամիությունը հովանավորում է Ադրբեջանին և Թուրքմենստանին Հարավային միջանցք նախագծի հարցում»,- գրում է Գերմանիայի նախկին արտգործնախարար, ներկայումս Nabucco-ի քաղաքական խորհրդատու Յոշկա Ֆիշերը: Նրա կարծիքով, Եվրահանձնաժողովի ղեկավար Ժոզե Բառոզուի և էներգետիկայի հանձնակատար Գյունթեր Օթինգերի այցը հենց այդ մասին է վկայում, չնայած Բաքուն և Աշգաբադը դեռ հստակ չեն որոշել՝ ինչքան վառելիք են առաքելու Եվրոպա: Ֆիշերի կարծիքով, Ադրբեջանն ու Թուրքմենստանը շահավետ դիրքում են նաև այն պատճառով, որ Հնդկաստանն ու Չինաստանը նույնպես վառելիքի մեծ պահանջարկ ունեն: Սակայն Nabucco-ի իրականացման վրա բացասաբար է ազդում վառելիքի առաքման հետ կապված որոշակի անորոշությունը, ինչը հետ է պահում շատ ներդրողների: Իսկ ահա Օքսֆորդի էներգետիկ հետազոտությունների կենտրոնի գազային հետազոտությունների ղեկավար Ջոնաթան Սթերնը համարում է, որ Ադրբեջանի որոշումը կկանխորոշի Nabucco-ի ճակատագիրը: Այս հարցում որոշիչ կլինեն առաջիկա ամիսները՝ կարծում է CMX էներգետիկ խորհրդատվական ընկերության գործադիր տնօրեն Ջենիֆեր Քուլիջը: